“Барыс“ камбэк жасап, буллит сериясында “Спартакты“ жеңді

ҚХЛ тұрақты чемпионатындағы "Барыс" пен "Спартак" матчы. Фото: hcbarys.kz

Астаналық "Барыс" Құрлықтық хоккей лигасының (ҚХЛ) тұрақты чемпионаты аясындағы матчте мәскеулік "Спартакты" буллит сериясында 4:3 есебімен жеңді. Үшінші кезеңде есе жіберіп тұрғанына қарамастан, елордалықтар камбэк жасады, деп хабарлайды Tengri Sport Vesti.kz сайтына сілтеме жасап.

Кездесудің алғашқы кезеңінде қақпаға шайба салынған жоқ. Үзілістен кейін қос команда да ширақ қимылдап, сегізінші минутта есеп ашылды.

"Спартак" басымдылыққа ие болып, Даниил Гутик "Барыс" қақпасын дәл көздеді. Астаналықтар 11-минутта жауап қайтарды, гол авторы – Логан Дэй.

Қонақтар қарсылас қақпасын торуылдауды жалғастырып, 15-минутта Әлихан Әсетовтің шайбасының арқасында алға шықты.

Дегенмен мәскеуліктер үзіліске дейін есепті теңестіріп үлгерді. "Спартак" сандық азшылықта жүріп гол соқты - 17-минутта Данил Пивчулин таразы басын теңестірді.

Үшінші кезеңде айдын иелері қайтадан алға шықты. Тоғызыншы минутта Люк Локхарт астаналықтар қақпасына шайба салып, есепті 3:2-ге жеткізді.

"Барыс" берілген жоқ және есепті теңестірудің жолын іздеді. Қонақтардың талпынысы 19-минутта нәтиже беріп, Тайс Томпсон маңызды шайба соғып, ойынды овертаймға ұластырды.

Қосымша уақытта жеңімпаз анықталмағандықтан, матч тағдыры буллит сериясында шешілді. Астаналықтар бір буллитті сәтті орындаса, "Спартак" ойыншылары бірде-бір мүмкіндікті пайдалана алмады.

Осылайша, "Барыс" сырт айдында жеңіске жетті. Бұл матчтен кейін астаналық клубтың еншісінде 14 ұпай бар, команда ҚХЛ Шығыс конференциясында төртінші орында тұр.

"Спартак" буллит сериясында жеңілгені үшін бір ұпай еншілеп, 12 ұпаймен Батыс конференциясында алтыншы сатыға жайғасты.