+7 (777) 001 44
99
Бүгін, 1 қыркүйекте клуб басшылығы маусым алдында БАҚ өкілдерімен дәстүрлі кездесу өткізді.
Команданың бас бапкері Михаил Кравец құрамның жасақталуына қатысты пікір білдірді.
"Құрамды үлкен күш жұмсап күшейттік, бюджетімізге сай ойыншыларды таңдап, тарта алдық. Қазір бір қорғаушы жетіспейді, бұл бағытта жұмыс істеп жатырмыз. Қазір төрт тізбек бар, бірақ алдағы уақытта мәселе туындауы мүмкін. Яғни, кез келген жарақат біз үшін ауыр тиеді.
Бұл, бәлкім, басты мәселе. Егер жарақаттар аз болып, олар жеңіл өтсе, бізде жақсы команда, төрт мықты тізбек және лайықты ойын көрсететін қақпашылар құрамы бар деп ойлаймын", - деді Михаил Кравец баспасөз мәслихатында.
Ал қойылған міндеттерге келсек, "Барыстың" мақсаты - кейінгі бес жылда алғаш рет кедергілерден өтіп, плей-офф сатысына шығу.
"Әрине, біз әр ойынға жеңіске жету міндетін қоямыз. Әлбетте, плей-оффқа шығу, бұдан басқа нұсқа жоқ", - деп атап өтті тәлімгер.
Айта кетейік, "Барыс" кейінгі төрт маусым қатарынан Гагарин кубогының плей-офф кезеңіне шыға алмады. Өткен жылы команда чемпионаттың жалпы кестесінде 18-ші орынмен маусымды аяқтаған болатын.
Жаңа тұрақты маусымды команда 7 қыркүйек күні "Барыс Аренада" Новосібірдің "Сибирь" клубына қарсы ойынмен бастайды.
