Бибісара Асаубаева әлем чемпионын жеңгені үшін қанша табыс тапты?

Фото © Tengrinews.kz / Маржан Қуандықова

Қазақстандық шахматшы Бибісара Асаубаева Ослода (Норвегия) өткен беделді Norway Chess-2026 турнирінде жеңіске жетіп, 36 миллион теңге табыс тапты, деп хабарлайды Tengri Sport тілшісі турнирдің баспасөз қызметіне сілтеме жасап.

22 жастағы қазақстандық шахматшы турнирдің аяқталуына бір тур қалғанда, яғни украиналық Анна Музычукпен өткен кездесуден кейін мерзімінен бұрын жеңімпаз атанды.

Матч тең аяқталып, кейін "армагеддонға" ұласты. Бұл Бибісараға қажетті ұпайларды жинауға мүмкіндік берді.

Айта кетейік, Norway Chess-2026 турнирінде ерлер мен әйелдер арасындағы жүлде қоры бірдей. Осылайша, қазақстандық шахматшы 700 мың норвегиялық крон немесе 36,4 миллион теңге (салықтарды шегергенге дейін) сыйақы иеленді.

Еске сала кетейік, турнир аясында Бибісара көптеген атақты қарсыласын, соның ішінде шахматтан әлемнің 17-ші чемпионы, өз атағын бес рет қорғаған қытайлық Цзюй Вэньцзюньді де басып озды.