Бибісара Асаубаева Франциядағы беделді турнирдің чемпионы атанды

Фото © Tengrinews.kz / Маржан Қуандықова

Қазақстанның үздік шахматшысы, блицтен үш дүркін әлем чемпионы Бибісара Асаубаева рапид турнирінің жеңімпазы атанды, деп хабарлайды Tengri Sport.

Сен-Тропедегі (Франция) WR Women's Chess Tour 2026 еуропалық кезеңі аясында рапидтен турнир өтті. Жарыс финалында қазақстандық шахматшы Бибісара Асаубаева украиналық Мария Музычукты 2:0 есебімен жеңді.

Айта кетейік, Бибісара Асаубаева блиц-шахмат дисциплинасы бойынша чемпиондық атақ үшін күресті жалғастырады.

WR Women's Chess Tour 2026 - төрт құрлықтық кезеңнен және жыл соңындағы гранд-финалдан тұратын элиталық әйелдер шахматы турнирлерінің жаһандық сериясы. Турнир форматы - жылдам шахмат (блиц және рапид). Сен-Тропедегі (Франция) кезең 25-26 тамыз аралығында өтуде. Турнирдің жүлде қоры 40 мың долларды құрады.

Бибісара Асаубаева - Қазақстан тарихындағы тұңғыш үш дүркін әлем чемпионы

Қазақстандық 22 жастағы шахматшы 2025 жылдың соңында мансабында үшінші рет блицтен әлем чемпионатында жеңіске жетті. Бұл жетістік Бибісараны бірегей чемпион етті: ел тарихында спорттың бұл түрінен ешкім мұндай биікке көтерілмеген.