“Бұл таныстықпен жасалмайды“: Әлімханұлы - Канело жекпе-жегі туралы не белгілі?

Қазақстандық Жәнібек Әлімханұлы орта салмақтағы әлем чемпионы атағынан бас тартқаннан кейін, жаңа санаттағы WBO рейтингінде бірден екінші сатыға жайғасты.

Қазіргі таңда біздің боксшыдан жоғары тек Ұлыбританиядан келген әлем чемпионы Хамза Шираз бен атақты мексикалық Сауль "Канело" Альварес қана тұр.

"Жәнібекті Канелодан кейін екінші орынға қойды. Мен олар бірінші орынға қояды деп ойлағанмын. Бірақ Канелоның танымалдылығы жоғары болғандықтан, Жәнібекті екінші орынға қойған болуы мүмкін. Жәнібек - элиталы боксшы. Мұны бәрі біледі, бәрі мойындайды.

Ол орта салмақта WBO титулын бірнеше рет қорғап, өзінің кім екенін, өзіндік стилін және рингте не істей алатынын дәлелдеді. Сондықтан оның бокс әлемінде беделі өте жоғары. Жәнібекті бәрі бағалайды, жақсы көреді, әрине, ол WBO тарапынан құрметке лайық", - деді Берік Сұлтан Tengri Sport-қа берген сұхбатында.

Сонымен қатар рейтингтегі екінші орын қазақстандыққа жаңа салмақ дәрежесінде бірден чемпиондық жекпе-жек өткізуге мүмкіндік беруі мүмкін.

"Осы аптада жақсы жаңалық болады деп ойлаймын, өйткені бұған дейін WBO басшысы Жәнібектің чемпиондық атаққа міндетті үміткер бола алатынын мәлімдеген болатын. Біздің қазіргі басымдығымыз - рейтингте тұру емес, бірден чемпион Ширазбен жұдырықтасу", - деп атап өтті менеджер.

Канело мен Әлімханұлы жекпе-жегі қашан өтуі мүмкін?

Айта кетейік, Канелоның кезекті жекпе-жегі жоспарланып қойған - қазан айында ол WBC желісі бойынша титул үшін франциялық Кристиан Мбилли Ассомомен кездеседі. Одан кейін Жәнібек өз жеңісіне қол жеткізіп, содан кейін ғана мексикалықпен келіссөздерді бастауы қажет.

"Сірә, біз Ширазбен жұдырықтасатын боламыз. Ширазды жеңіп, содан кейін бұрынғы салмақтағыдай, осы санаттағы барлық төрт белбеуді біріктіруге тырысамыз.

Сондықтан Ширазбен кездесуден кейін Канеломен міндетті түрде келіссөздер жүргізіледі. Қазір WBO-дан ресми жаңалықтарды күтіп отырмыз. Өтініш берілді, бәрін ережеге сай жасап жатырмыз және ресми үміткер боламыз деп үміттенеміз", - деді менеджер.

WBO ұйымы Жәнібектің әлемдік бокста қандай беделге ие екенін қазірдің өзінде көрсетті.

"Жәнібектің барлық жанкүйерлері мен қазақстандықтар оның бірден жоғары салмақ дәрежесіндегі рейтингте жоғары тұрғанына қатты қуанды. Канелодан кейін бірден екінші орында тұру - Жәнібектің әлемдік бокстағы беделін көрсетеді. Мұндай нәрсе өтінішпен немесе таныстықпен жасалмайды. Бұл тәжірибеге сүйеніп жасалады - боксшының деңгейіне қарайды. Сондықтан қазақстандықтың әлемдік бокс қауымдастығында осындай беделге ие болуы біз үшін үлкен мәртебе", - деп түйіндеді Берік Сұлтан.

Жәнібек Әлімханұлы рингке жыл соңына дейін оралуы мүмкін

Еске сала кетейік, орта салмақтағы қазақстандық бұрынғы әлем чемпионы соңғы жекпе-жегін 2025 жылдың сәуір айында өткізген болатын - сол кезде Жәнібек "Барыс Аренада" франциялық Анауэль Нгамиссенгені сенімді түрде жеңген еді.

Одан кейін, 2025 жылдың желтоқсанында Әлімханұлы орта салмақтағы үшінші титул үшін жекпе-жек өткізуі керек еді, бірақ оның қанынан допинг табылуына байланысты кездесу өтпей қалды.

Халықаралық ұйымдар бір жылдық дисквалификациямен шектелді, ол желтоқсанда аяқталады. Сол кезде Әлімханұлы рингке ресми түрде орала алады.

Әлімханұлы Канелоға қарсы: WBO қазақстандықтың рейтингтегі орнын анықтады