+7 (777) 001 44
99
Әлеуметтік желілерде "Астана" футболшылары қол қойып, клуб басшылығына жолдады делінген хаттың мәтіні пайда болды.
Онда ойыншылар кемінде үш айлық жалақы қарызын өтеуді талап еткен. Әйтпесе, олар келесі кездесуде алаңға шығудан бас тартатындарын айтқан.
Осыдан кейін клубтың Instagram-дағы ресми парақшасында қаржыландыруға қатысты қиындықтар бары расталды.
"Астана" ФК негізгі құрамдағы бірқатар футболшы алдында жекелеген келісімшарттық міндеттемелер бойынша берешектің бар екенін растайды, осыған байланысты клубқа ұжымдық үндеу түсті.
Клуб басшылығы футболшылардың ұстанымына түсіністікпен қарайды.
Туындаған қаржылық қиындықтарға қарамастан, футболшылар мен жаттықтырушылар штабы ұзақ уақыт бойы өздерінің кәсіби міндеттерін толық көлемде орындап, оқу-жаттығу жиындары мен ресми матчтерге қатысып, алаңда "Астана" ФК мен Қазақстан елордасының намысын абыроймен қорғап келеді", - делінген мәлімдемеде.
Сонымен қатар, клуб өкілдері тіпті негізгі құрам ойыншылары ойынға шығудан бас тартқан жағдайда да, команда Қазақстан чемпионатындағы өнерін жалғастыратынын атап өтті.
"Клуб әрбір футболшы мен қызметкердің отбасы алдында міндеттемелері бар екенін түсінеді. Келісімшарттық міндеттемелерді уақтылы орындау - кәсіби футбол клубының негізгі міндеттерінің бірі.
Қазіргі уақытта "Астана" ФК басшылығы құрылтайшымен бірлесіп, клубтың қаржылық жағдайын тұрақтандыруға және қалыптасқан берешекті реттеуге бағытталған жұмыстар жүргізіп жатыр. Бұл мәселені шешу клуб үшін басым бағыттардың бірі саналады. "Астана" ФК Қазақстан Республикасының чемпионатындағы қатысуын жалғастыратынын және 2026 жылғы маусымды толық аяқтайтынын ерекше атап өтеді.
Клубтың чемпионатқа қатысуын тоқтату мәселесі қарастырылып жатқан жоқ. Қажет болған жағдайда негізгі құрамға резервтік команданың, жастар командасының ойыншыларын немесе Клуб атынан өнер көрсетуге құқығы бар басқа да футболшыларды тарту мүмкіндігі қарастырылады. Клуб күнтізбеге сәйкес барлық матчтарға қатысуды қамтамасыз етеді", - деп толықтырды клубтағылар.
Министр "Астананың" жекеге өтетінін 30 желтоқсанда-ақ мәлімдеген болатын
30 желтоқсанда үкіметте өткен брифингте Ербол Мырзабосынов коммерцияландыру 2026 жылы жоспарланып отырғанын айтты.
"Клуб үнемі Sport Qory бірыңғай операторынан қаржыландырылып келді. Биыл біз бұл клубты коммерцияландыруды жоспарлап отырмыз. Белсенді жұмыс істеп жатырмыз, инвесторлар бар. Процедура аяқталғанша оның атын атай алмаймыз", - деді ол.
Министрлік "Астана" БК-ны қаржыландыру тоқтатылғанын жариялаған соң, Tengri Sport ведомствоға футбол клубына қатысты сауал жолдады. Инвесторларды іздеу жұмыстары әлі аяқталмағаны, ал командаға қайырымдылық көмек ретінде миллиардтар бөлініп жатқаны белгілі болды.
"2026 жылы "Астана" футбол клубына Қор тарапынан 3 миллиард теңге көлемінде қайырымдылық көмек бөлінді. Мемлекет басшысының 2025 жылғы 8 қыркүйектегі кәсіби клубтарды жекешелендіруді қамтамасыз ету және оларды басқарудағы мемлекеттің қатысуын азайту туралы тапсырмасына байланысты, қазіргі уақытта "Астана" ФК-ны бәсекелестік ортаға беру үшін әлеуетті жеке инвестормен келіссөздер жүргізіліп жатыр", - делінген біздің сауалымызға берілген жауапта.
Айта кетейік, "Астана" футбол клубы да команданың жекеменшікке өткені туралы әлі мәлімдеген жоқ.
"Астана" - Қазақстандағы ең титулды команда
Еске сала кетейік, "Астана" - футболдан елдің жеті дүркін чемпионы және Қазақстан кубогының үш дүркін иегері. Қазақстандық командалардың ешбірінде мұндай көп титул жоқ.
Дегенмен, кейінгі үш жылда команда чемпиондықты қайтара алмай келеді: 2023 жылы "Ордабасы", ал 2024 және 2025 жылдары "Қайрат" чемпион атанды. Биыл да "Астана" үшінші орында келеді және алтын медальдан үмітін үзуге жақын.
Instagram-дағы бұл жарияланымды көру
Бұдан бөлек, "Астана" еурокубоктардың күзгі кезеңіне шығудан қалды. 2024 жылы команда Конференция лигасының жалпы кезеңіне өтіп, Қазақстанға "Челсиді" алып келе алған еді, бірақ кейінгі екі жылда команданың Еуропадағы жолы іріктеудің алғашқы кезеңдерінде-ақ аяқталып жүр.
