Дастан Сатпаев ірі жеңілістен кейін “Бернли“ бапкерінің жоғары бағасына ие болды

Еске салайық, кешегі матчта қазақстандық футболшының командасы "Норвичтен" 1:4 есебімен жеңілді. 18 жастағы Дастан Сәтпаев үшін бұл Чемпионшип аясында негізгі құрамда алаңға шыққан алғашқы матч болды.

Сәтпаев алаңда толық 90 минут ойнап, қақпаға үш рет соққы бағыттады, бес рет қарсыласын сәтті алдап өтті, 33 пастың 24-ін дәл жеткізді және 14 жекпе-жекте жеңіске жетті. Flashscore порталы оның ойынына 7,6 балл беріп, "Бернли" сапындағы ең үздік футболшы деп таныды.

"Дастанның ойынын өздеріңіз көрдіңіздер: 18 жастағы жігіт бүгін біздің ең үздік футболшымыз болды. Бірақ құрамда өз-өзіне сенімсіз көрінетін немесе ойынына қатысты сұрақ туындайтын басқа да ойыншылар бар. Дастанның көрсеткен жігері мен команда үшін қалай күрескеніне қарасақ, алаңға шыққан әр футболшы дәл осындай деңгей көрсетуі керек", — деді "Бернли" бапкері.

– Сіз Дастанды атап өттіңіз. Құрамда жас ойыншылар, әсіресе жаңадан келгендер көп. Осындай қиын нәтижелер тіркеліп жатқан кезеңде тәжірибелі футболшылардың рөлі қаншалықты маңызды? Олар жастарға бағыт-бағдар беріп, сенімділік ұялатуда және киім ауыстыратын бөлмеде қаншалықты әсер ете алады?

"Иә, өте орынды сұрақ. Дәл осы мәселені қазір клуб басшылығымен талқылап жатырмыз. Біз көшбасшылық қасиеті бар, Чемпионшиптің не екенін жақсы білетін және жеңіске қалай жету керектігін түсінетін футболшыларды қатарымызға қосу үшін белсенді жұмыс істеп жатырмыз. Қазір бізге дәл осындай ойыншылар жетіспейді. Сондықтан алдағы бірнеше күнде, тіпті жақын екі күнде осындай футболшыларды көндіріп, келісімшартқа отырғызу үшін барымызды саламыз", — деп толықтырды Ники Хайен.

Осы жеңілістен кейін "Бернли" Чемпионшип турнирлік кестесінде 22-орынға түсіп, төмендеу аймағына енді. Ники Хайеннің командасы чемпионатта әлі жеңіске жеткен жоқ: "Вест Хэммен" тең түсіп, "Вест Бромвич" пен "Норвичтен" жеңілді.

"Бернли" келесі матчын Чемпионшиптің 4-туры аясында 2 қыркүйектен 3 қыркүйекке қараған түні Қазақстан уақытымен сағат 00:00-де өткізеді. Қарсыласы — турнирлік кестенің жоғарғы бөлігінде келе жатқан "Мидлсбро".

Бұған дейін Қазақстан құрамасының қақпашысы Стас Покатилов өнер көрсететін әзербайжандық "Сабах" клубы футболшылардың Чемпиондар лигасы жеребесіне реакциясы түсірілген видеоны жариялаған болатын.

Сондай-ақ Монакода Конференция лигасының жалпы кезеңіне жеребе тартылып, алматылық "Қайраттың" қарсыластары анықталған еді. Грекия, Румыния және Швеция БАҚ-тары командалардың Қазақстанға алдағы сапарларына қатысты пікір білдірген.