Димаш Құдайберген WBC бокс ұйымының белбеуін иеленді

Бейнеден кадрлар

Қазақстандық атақты әнші Димаш Құдайберген Мехикодағы (Мексика) концерті кезінде Дүниежүзілік бокс кеңесінің (WBC) белбеуін иеленді, деп хабарлайды Tengri Sport әртістің әлеуметтік желідегі парақшасына сілтеме жасап.

Қазақстандық әншіге құрмет белбеуді ұйым өкілдері кіші Хектор Сулейман, Хосе Антонио Арреола Сулейман және Виктор Сильва, сондай-ақ Қазақстанның WBC-дегі өкілі Әлихан Жарылғапов табыстады.

Димаш бұл марапат – қазақ елі өнерінің халықаралық деңгейдегі абыройы мен жаһандық мәдениеттегі жетістігі үшін табысталады деп санайтынын жеткізді.

"Мексикадағы бұл кеш мен үшін ерекше болды. Сахнада құрмет пен игі ниеттің белгісі ретінде Дүниежүзілік бокс кеңесінің (WBC) белбеуін алу — мен үшін үлкен мәртебе әрі өмірімдегі ұмытылмас сәт. Спорт пен музыка әртүрлі тілде сөйлегенімен, оларды ең басты нәрсе: рух, тәртіп, кемелдікке ұмтылу және дүние жүзіндегі адамдардың басын біріктіру қабілеті ұштастырады.

Осындай символдық мәні зор әрі маңызды қадам үшін WBC-ге шын жүректен алғыс айтамын. Сондай-ақ әрине, сүйікті Мексикаға, сіздердің алдарыңызға сахнаға шыққан сайын сезінетін шексіз махаббаттарыңыз бен жылулықтарыңыз, құрметтеріңіз үшін рақмет. Мен үшін бұл белбеу сыйлық қана емес, достық пен өзара құрметтің, бірліктің символы", - деп жазды әнші әлеуметтік желіде.

Айта кетейік, Қазақстан боксшылары арасында WBC толыққанды белбеуіне ие болған жалғыз спортшы - Геннадий Головкин.

Ал құрмет белбеуін әр жылдары АҚШ президенті Дональд Трамп, ОАР-дың бұрынғы президенті Нельсон Мандела иеленген. Қазақстан азаматтары арасында, мәселен, Алматы әуежайында пышақ ұстаған қылмыскерді ұстап, қызды құтқарып қалған 52 жастағы Мұса Әбдірайым осы марапатқа ие болған.

Instagram-дағы бұл жарияланымды көру

Димаш Құдайбергеннің (@kudaibergenov.dimash) жарияланымы

Қазақстан шетел азаматтары құрметпен қарайтын, ықпалды мемлекетке айналды - Президент

Пікірлер