+7 (777) 001 44
99
Бокстан қазақстандық әлем чемпионы Жәнібек Әлімханұлының командасы допинг дауынан кейін бокс ұйымдарының оны жекпе-жектерден шеттету туралы шешіміне апелляция берді. Жаза мерзімі қанша уақытқа өзгеруі мүмкін екені белгілі болды, деп хабарлайды Tengri Sport.
Қазақстандықтың апелляция бергені туралы WBO басшысы Густаво Оливьери Сесар Сэдке берген сұхбатында мәлімдеді. Оның айтуынша, арнайы комиссия Әлімханұлына салынған санкцияларды алып тастау туралы шешім қабылдауы мүмкін.
Tengri Sport тілшісі Қазақстан кәсіпқой бокс федерациясының (ҚКБФ) президенті Рақымжан Ерденбековке хабарласып, апелляцияның мән-жайын білді.
"Америкада адвокат бірден екі ұйымға: IBF пен WBO-ға апелляция түсірді. Мен Жәнібектің менеджері Эгис Климаспен және оның АҚШ-тағы адвокатымен жеке байланыстамын", - деді Ерденбеков.
- Бұл дисквалификация мерзімін қысқартуға қаншалықты көмектесуі мүмкін және сіздің болжамыңыз бойынша ол барынша қанша уақытқа азаюы ықтимал?
"Қазір мүмкіндік 50-де 50. Қысқартуға келетін болсақ - біз халықаралық санкциялардың ҚКБФ санкцияларымен ұқсас болуына қол жеткізуге тырысып жатырмыз", - деді ол.
Еске сала кетейік, Әлімханұлының қанынан тыйым салынған заттар табылғаны расталғаннан кейін, ҚКБФ Жәнібекті 2026 жылдың маусымына дейін жекпе-жектерден шеттету туралы шешім шығарған болатын. Ал WBO мен IBF қазақстандықты бір жылға - 2026 жылдың желтоқсанына дейін шеттетті.
Осылайша, Әлімханұлының командасы қазақстандық боксшыны 2026 жылдың жаз-күз айларында рингке қайтаруға тырысып жатыр.
Жәнібек Әлімханұлы төңірегіндегі допинг дауы және оның салдары
Айта кетейік, тыйым салынған зат (мельдоний) Жәнібек Әлімханұлының қанынан 2025 жылдың желтоқсанында кубалық Эрисланди Лараға қарсы үшінші әлем чемпионы атағы үшін өтуі тиіс жекпе-жекке бірнеше күн қалғанда табылған.
Жекпе-жек В сынамасы ашылғанға дейін тоқтатылды, ал тыйым салынған заттың бар екені расталғаннан кейін қазақстандық иелік еткен белбеулердің ұйымдары санкциялар қолдана бастады.
Instagram-дағы бұл жарияланымды көру
WBO Жәнібекті бір жылға шеттетті, бірақ оның орта салмақтағы әлем чемпионы атағын сақтап қалды. Дегенмен рингке оралған бойда міндетті қорғау жекпе-жегін өткізуді міндеттеді.
IBF те Әлімханұлына бір жылға тыйым салды, бірақ қатаңырақ болды - белбеуді тартып алып, оны бос деп жариялады. Рас, қазіргі уақытқа дейін бұл белбеу үшін жекпе-жек өткен жоқ.
Жәнібек Әлімханұлы мен оның командасы болған жағдайға қарамастан, өз мәлімдемелерінде таза спортты жақтайтынын бірнеше рет атап өтті.
Instagram-дағы бұл жарияланымды көру
