Елена Рыбакина US Open турнирінің үшінші айналымына шықты

Елена Рыбакина. Фото: Андрей Ударцев/ҚТФ©

Қазақстанның бірінші ракеткасы Елена Рыбакина АҚШ ашық чемпионаты - US Open 2026 турнирінің үшінші айналымына шықты. Екінші айналымдағы матчте қазақстандық теннисші испаниялық Джессика Боусас Манейроны сенімді түрде жеңді, деп хабарлайды Tengri Sport Vesti.kz сайтына сілтеме жасап.

Матч бір сағат сегіз минутқа созылды. Рыбакина ойын барысын толық бақылауда ұстап, кездесуді екі сетте 6:2, 6:4 есебімен аяқтады.

Instagram-дағы бұл жарияланымды көру

US Open (@usopen) жариялаған жазба

US Open турнирінің үшінші айналымында қазақстандық теннисші әлемдік рейтингте 58-орында тұрған украиналық Юлия Стародубцевамен кездеседі.

Рыбакина үшін бұл биылғы турнирдегі екінші жеңіс. Бірінші айналымда ол америкалық Тея Фродиннен 6:3, 6:2 есебімен басым түсті.

АҚШ ашық чемпионаты 30 тамыз бен 13 қыркүйек аралығында Нью-Йоркте өтеді. Әйелдер арасындағы турнирдің жүлде қоры шамамен 49 миллион долларды құрайды.

Рыбакина рейтингтің бірінші сатысы үшін күресіп жатыр

US Open 2026 турнирі Рыбакина үшін тек титулға талас қана емес, сонымен қатар ерекше маңызға ие. Қазақстандық теннисші өз мансабында алғаш рет әлемдік рейтингтің көшін бастауы мүмкін.

Турнир басталар алдында Рыбакина екінші орында тұрған еді, ал әлемнің бірінші ракеткасы беларусьтік Арина Соболенко болатын. БАҚ мәліметінше, егер Рыбакина жартылай финалға дейін жетсе, рейтингтегі бірінші орынды иеленуіне кепілдік бар.

Елена Рыбакина Теннис