Елена Рыбакина коллекциясындағы екінші суперкарды не істейтінін айтты

Қазақстандық әлемнің екінші ракеткасы, теннисші Елена Рыбакина Штутгарттағы (Германия) турнирде жеңіске жеткені үшін алған сыйлығы туралы сұраққа жауап берді. Осыдан екі жыл бұрынғыдай, қазақстандық спортшы гонорар мен ұпайдан бөлек, Porsche автокөлігін иеленді, деп хабарлайды Tengri Sport тілшісі турнирдің баспасөз қызметіне сілтеме жасап.

Жеңістен кейінгі баспасөз мәслихатында журналистер қазақстандық теннисшіден көліктерін не істейтінін сұрады.

– Сіз Porsche ұтып алдыңыз. Екінші көлікті не істейсіз? Өзіңізге қалдырасыз ба, әлде сатасыз ба?

"Жоқ, мен оны міндетті түрде өзіме қалдырамын (жымиып – ред.), көліктің рахатын көремін. Тек мен ғана рөлге отырмаймын. Менің үлкен командам, отбасым бар. Бәрімізге ұнайды деп ойлаймын. Өкінішке қарай, біз жарыстарда жиі болатындықтан, үйде ұзақ қалып, көліктердің рахатын көре алмаймыз, бірақ маусым аяқталғанда мұны міндетті түрде істеймін", - деп жауап берді қазақстандық теннисші.

Айта кетейік, биылғы жеңісі үшін Рыбакина құны 122 мың доллардан (шамамен 60 миллион теңге) басталатын Porsche 911 моделін алды. Осыдан екі жыл бұрын ол жеңісі үшін бағасы сәл қымбатырақ Porsche Taycan 4s көлігін иеленген болатын, бірақ жүргізуші куәлігі болмағандықтан, ұзақ уақыт бойы рөлге отыра алмаған еді.

– Биыл көлік ұтып алудың қандай да бір ерекшелігі болды ма және өзіңізді қалай ынталандырдыңыз: екі жыл бұрынғы жағдаймен салыстырғанда, енді оны жүргізе алатыныңыз әсер етті ме?

"Иә, екі жыл бұрын рөлге отырмай, жолаушылар орнында отыруға мәжбүр болғаныма өкінген едім (жымиып – ред.). Ал қазір бұл өте тамаша болды. Бірінші рет жеңіске жеткенде, мен өзіме: "Жақсы, келесі жолы оралғанда, көлік жүргізуге дайын боламын" деп айтқанмын. Солай болды да, иә, мен өте қуаныштымын және бақыттымын", - деп жауап берді Елена.

– Жүргізуші ретінде өз стиліңізді қалай сипаттар едіңіз? Сіз корттағыдай сабырлы стильді қалайсыз ба, әлде ойыныңыз сияқты жылдамдықты ұнатасыз ба?

"Айту қиын. Менің ойымша, қасымдағы адамдар баға беруі керек. Бірақ мен көлікті қауіпсіз айдаймын деп есептеймін. Ешқайда асықпай, еркін отыратын кездерім болады. Кейде жылдамырақ жүргім келетін сәттер де болады, сондықтан мен үшін ең бастысы - қауіпсіздік", - деді қазақстандық спортшы.

Еске сала кетейік, Штутгартта өткен беделді WTA 500 сериялы турнирінің финалында Елена Рыбакина екі сетте чехиялық теннисші Каролина Мухованы тізе бүктірді. Жеңістен кейін бірден қазақстандық теннисшіге ашық сары түсті жаңа көлік табыс етілді.

Штутгарт чемпионы Елена Рыбакина өзінің жүлдесі - Porsche 911 көлігін тізгіндеді 😍🚗

[Дереккөз: @TennisChannel ]pic.twitter.com/pAnyi1xAVn-

FirstSportz Tennis (@FS_Tennis1) 19 сәуір, 2026 жыл