Еркебұлан Тоқтар өзбекстандық әлем чемпионына қарсы жекпе-жек өткізеді

Еркебулан Тоқтардың IBA Nomad Fighting ұйымдары ұйымдастырған International boxing day турнирінде жұдырықтасатыны белгілі болды. Қазақстандықтың қарсыласы - ұйымдастырушылардың мәліметінше, муай-тайдан әлем чемпионы, өзбекстандық файтер Бобиржон Исроилов.

Жекпе-жек 28 тамызда Астанадағы Жақсылық Үшкемпіров атындағы жекпе-жек сарайында өтеді және кештің басты оқиғаларының бірі (со-main event) болады.

Айта кетейік, аталған турнирдің басты кездесуінде қазақстандық боксшы, әуесқойлар арасындағы екі дүркін әлем чемпионы Санжар Тәшкенбай өнер көрсетеді.

Ол филиппиндік Нил Джакамосқа қарсы кәсіпқой рингтегі жекпе-жегінде IBF Asia чемпиондық титулын сарапқа салады.

Сондай-ақ турнирде тағы бір қазақстандық әлем чемпионы - Сәкен Бибосынов жұдырықтасады. Ол WBO Africa белбеуінің иегері, намибиялық боксшы Иммануэль Йозефпен кездеседі.

Еркебұлан Тоқтар деген кім?

Тоқтар - ұзақ уақыт бойы поп-MMA-да өнер көрсетіп, кейін кәсіпқой жекпе-жекке ауысқан қазақстандық актер. Қазіргі таңда оның рекорды 11-3 құрайды.

Арменияда өткен соңғы жекпе-жегінде Тоқтар төрешілердің шешімімен Қырғызстан өкілі Марсель Нұрланбек ұлынан жеңіліп қалды.

Қазіргі уақытта Тоқтар - Қазақстандағы поп-ММА-дың ең танымал өкілі, оның инстаграм парақшасына 2,3 миллион адам жазылған.