“Еркелеткенді жақсы көремін“ - Шайдоров Олимпиададағы жеңісінен кейінгі қымбат сыйлықтар туралы

Мәнерлеп сырғанаушының айтуынша, Қазақстан тарихындағы тұңғыш Олимпиада чемпионы атанғаннан кейін ол өте көп сыйлық алған. Спортшы олардың басым бөлігін ата-анасына берген.

"Олимпиададан кейін маған көптеген сыйлық, соның ішінде қымбат заттар берілді. Бірақ менің ойымша, мұның бәрі – отбасыма тиесілі. Маған мұз айдынында сырғанау маңызды, бұл менің сүйікті ісім, ал қолымда барымның бәрін отбасыма қуана беремін", - деді Шайдоров "Спортс" басылымына берген сұхбатында.

Сондай-ақ, ол ақшаға деген көзқарасын бөлісті.

- Сен үшін ақша қаншалықты маңызды?

- Мен ақшаны да отбасым арқылы қабылдаймын. Сапарлардан үйге бірдеңе әкелу, анамды қуанту – бұл мен үшін маңызды, мен оларды еркелеткенді жақсы көремін, - деп бөлісті Шайдоров.

Михаил Шайдоров кім?

Михаил Шайдоров небәрі 22 жаста болса да, ол Төрт құрлық чемпионатын, әлем чемпионатының күміс жүлдесін және Олимпиада ойындарын жеңіп үлгерді.

2026 жылдың ақпанында Италияда өткен Олимпиадада ол мәнерлеп сырғанаудың еркін бағдарламасы бойынша барлық қарсыластарын басып озды, дегенмен қысқа бағдарламадан кейін үздік үштіктің қатарында болмаған еді. Бұған дейін мұндай деңгейдегі турнирде қазақстандықтардың ең жоғары жетістігі – Денис Теннің 2014 жылғы Ойындардағы қола жүлдесі болатын.

Шайдоров Олимпиададан кейін өнер көрсетпеген еді

Айта кетейік, Қазақстаннан шыққан Олимпиада чемпионы жеңісінен кейін әлем чемпионатына қатыспауға шешім қабылдап, басқа да жарыстарда көрінбеді. 25 қыркүйекте ол Олимпиададан кейін алғаш рет Братиславада (Словакия) өтетін ISU турнирінде мұз айдынына шығады.