Еуроны жеңіп, “Аякста“ жұмыс істеген: Қазақстан құрамасының жаңа бапкері туралы не белгілі?

Еуропа чемпионы атанған және Кройфпен жұмыс істеген

Ван’т Шкип басты табыстарына ойыншы кезінде қол жеткізген. Оның мансабында небәрі екі команда болды: Кройф баптаған аңызға айналған "Аякс" (1981–1992) және италиялық "Дженоа" (1992–1996).

Сол жылдары Нидерланд футболының дәуірі жүріп тұрған еді. Қазақстан құрамасының жаңа бапкері "Аякс" сапында Кубок иелері кубогін (1987) және УЕФА кубогін (1992) иеленіп, елдің бірнеше дүркін чемпионы атанды, сондай-ақ ұлттық құрамаға шақырту алды.

1988 жылы Нидерланд Еуропа чемпионатының финалына шығып, КСРО құрамасын 2:0 есебімен жеңді. Ван’т Шкип финалда алаңға шықпаса да, кез келген қосалқы құрамдағы ойыншы сияқты құраманың тарихи жеңісіне өз үлесін қосты.

Гректерді Әлем чемпионатына шығаруға шақ қалды

Футболшы мансабын аяқтаған бойда Ван’т Шкип бапкерлікке көшті - "Аякста" ассистент болды, жастармен жұмыс істеді, ал 2001 жылы "Твенте" клубын тізгіндеп, дербес мансабын бастады.

2010 жылы Джон Ван’т Шкип Аустралиядан бір-ақ шықты - оны "Мельбурн Харт" (қазіргі "Мельбурн Сити") клубына бапкерлікке ҚФФ-ның қазіргі бас хатшысы Скотт Манн шақырған болатын. Бапкердің Қазақстанға келуіне де Маннмен таныстығы себеп болған көрінеді.

"Біз бірге жұмыс істедік. Джонның әрі футболшы, әрі бапкер ретінде тәжірибесі мол екенін өздеріңіз де білесіздер. Ол әлемдегі ең үздік академиялардың бірі "Аякста" тәлім алған. Марк ван Бастен сияқты өте танымал жаттықтырушылармен бірге жұмыс істеді. Бапкер таңдаған кезде біз оның халықаралық тәжірибесіне басымдық бердік", - деді Манн баспасөз мәслихатында.

2019 жылы Джон алғаш рет ұлттық құраманы - Грекия командасын басқарды. Команда 2018 жылғы Әлем чемпионатына жолдама ала алмаған еді, сондықтан оған келесі Еуропа біріншілігіне шығу міндеті жүктелді.

Іріктеу кезеңінде италиялықтар бәрін жайпап өтсе, гректер екінші орын үшін Финляндия құрамасымен таласты. Алайда ұпай саны бойынша қалып қойып, турнирге өте алмады. Соған қарамастан, нидерландылық маманның жұмысына көңілдері толып, ол 2022 жылғы әлем чемпионатының іріктеу кезеңінде де қызметін жалғастырды.

Ол кезеңде Испаниямен тең түсіп (1:1), Швеция мен Грузияны жеңгенімен, команданы мундиальға алып шығудың сәті түспеді. Мансабының бұл кезеңі Косовомен тең ойынмен және топтағы үшінші орынмен аяқталды.

Арменияға Грузиямен шешуші бәсеке үшін шақырылды

2025 жылдың басында Ван ’т Шкип Ереванға келіп, бірден маңызды матчтарға - Ұлттар лигасының көршілес Грузияға қарсы өтпелі ойындарына кірісті. Команда екі кездесудің қорытындысы бойынша 1:9 есебімен ойсырай ұтылды.

Осыдан кейін бапкер тағы екі жолдастық кездесу өткізіп үлгеріп, қызметінен босатылды. 2025 жылдың маусым айынан бері Қазақстан құрамасының жаңа бапкері жұмыссыз болған.

Футболдан Қазақстан құрамасының жаңа бапкері тағайындалды