Футболдан Қазақстан құрамасы Әлем чемпионатының іріктеу кезеңінің плей-офф сатысына өтті

Футболдан Қазақстан әйелдер құрамасы 2027 жылғы әлем чемпионатының іріктеу кезеңіндегі плей-офф сатысына шықты, - деп хабарлайды Tengri Sport.

Футболдан Қазақстан әйелдер құрамасы өз іріктеу тобында екінші орын алып, еуропалық квалификацияның плей-офф кезеңінің алғашқы раундына жолдама алды.

Келесі кезеңде команданы жеребе күтіп тұр, ол матчтердегі қарсыласты анықтайды.

Плей-офф кезеңінің алғашқы раундына арналған жеребе тарту рәсімі 18 маусымда Ньонда (Швейцария) өтеді.

Еске салайық, топтағы соңғы матчте Қазақстан құрамасы Армения ұлттық командасымен кездескен болатын. Ереванда өткен ойын 1:1 есебімен тең аяқталды. 35-минутта қорғаушы Светлана Карагезян гол соғып, армян қыздарын алға шығарды.

Кейін 70-минутта қазақстандық шабуылшы Әмина Бибосынова таразы басын теңестірді.

Әйелдер арасындағы футболдан әлем чемпионаты 2027 жылдың 24 шілдесі мен 25 тамызы аралығында Бразилияда өтеді.