“Ғажайып хоккей“: “Барыс“ ойыншысы ҚХЛ-дың үздік қорғаушысы болды

Қазақстандық команданың хоккейшісі өз мансабында алғаш рет ҚХЛ-да айдың үздік қорғаушысы болды. Қыркүйекте Масси 8 ұпай (5+3) жинап үлгерді, оның соққан шайбалары екі рет жеңіс сыйлады, ал жалпы пайдалылық көрсеткіші +7-ге жетіп, оны лиганың үздік ойыншыларының біріне айналдырды.

Еске салайық, Масси "Барысқа" өткен маусымда ауысып келген болатын және Астана клубы сапында 77 матч өткізіп үлгерді.

"Ғажайып хоккей" - сарапшы Джейк Масси туралы

Біздің тілшімізге берген сұхбатында сарапшы Александр Олейник "Барыстың" биылғы маусымдағы бастамасы туралы айта келе, команда хоккейшілерінің арасынан ойын сапасы бойынша Массиді ерекше атап өтті. Оған әсіресе сырт айдындағы жеңісті матчте (4:1) "Динамо" қақпасына соғылған гол ерекше әсер қалдырған.

"Массидің голын алсақ, бұл нағыз Даллманның ойын мәнерін еске түсіреді. Массидің "Динамомен" өткен матчте көрсеткені мен үшін ғажайып хоккей болды. Әрине, ол жерде "Динамоның" айдын ойыншылары өрескел қателік жіберді, бірақ Масси сондай шеберлік көрсетпегенде, бұл қателік болмас еді. Керемет деңгей, осындай хоккейдің арқасында бүкіл команданың ойыны жүріп жатқаны көрініп тұр. Мұны қалай түсіндіруге болатынын білмеймін, бірақ ойын өте әсерлі, жарқын өтіп жатыр, бәрі бұдан ләззат алып, рахаттанып ойнап жүргені байқалады", - дейді сарапшы.

Еске салайық, "Барыс" осы маусымдағы 10 матчтен кейін ҚХЛ-дың Шығыс конференциясының турнир кестесінде бесінші орында келе жатыр. Команда қазіргі чемпионды сырт айдында жеңіп, "Динамо", "Сібір" және "Салават Юлаевты" тізе бүктіріп үлгерді, алайда соңғы үш кездесуде жеңіліске ұшырады.

“Қазіргі “Барыс“ бәрінен асып түссе екен деймін“ - сарапшы тарихтағы ең үздік команда туралы