+7 (777) 001 44
99
Хоккейден Қазақстан құрамасы Польшада бірінші дивизионның А тобындағы қорытынды ойынын өткізді, деп хабарлайды Tengri Sport.
Талғат Жайлауовтың шәкірттері Франция командасымен кездесті. Ойынның негізгі уақыты 1:1 есебімен аяқталды. Алдымен француздар есеп ашты: 46-минутта Флавиан Даир көзге түсті. Қазақстандықтар 51-минутта Дмитрий Бреус соққан голдың арқасында таразы басын теңестірді.
Овертаймда жеңімпаз анықталмады, ал буллиттер сериясында Қазақстан құрамасы 3:2 есебімен басым түсті.
Айта кетейік, бұл нәтиже Қазақстанның турнирлік кестедегі жағдайына еш әсер еткен жоқ. Бір күн бұрын команда кестеде бірінші орынға ие болып, элиталық дивизионға жолдаманы мерзімінен бұрын иеленген болатын. Ал Франция үшін бұл кездесудің маңызы зор еді, өйткені топ-дивизионға берілетін екінші жолдамадан бірден үш құрама - Франция, Польша және Украина үмітті болды.
Топтық кезеңде Қазақстан Литваны (4:1), Жапонияны (6:0), Польшаны (3:2) және Украинаны (5:4 Б) жеңді.
ӘЧ қорытындысы
Осылайша, Талғат Жайлауовтың командасы бірінші дивизион топтық кезеңдегі барлық матчта жеңіске жетіп, элиталық дивизионға жолдама алды.
Еске салайық, турнирдің алғашқы матчінде Қазақстан құрамасы Литва командасына қарсы екі кезең бойы 0:1 есебімен ұтылып жатқан. Алайда кейін ойынды өз пайдасына өзгертіп, 4:1 есебімен ірі жеңіске жетті.
Екінші кездесуде қазақстандықтар бұдан да сенімді өнер көрсетті - жапониялық хоккейшілер бірде-бір шайба соға алмай, Жайлауов шәкірттері 6:0 есебімен жеңіске жетті.
Әлем чемпионатындағы үшінші матчта Қазақстан құрамасы алаң иелерінен 0:1 есебімен қалып қойғанымен, матч барысын өзгертіп, жеңісті сериясын жалғастырды.
