“Жарақаты қайталануы мүмкін“: Шавкат Рахмоновтың жағдайы белгілі болды

Шавкат Рахмоновты оңалтумен айналысқан дәрігер Михаил Маркуарт жеңіліс көрмеген қазақстандықтың мансабын жалғастыруына енді ешқандай медициналық шектеу жоқ екеніне сендірді.

Оның айтуынша, ендігі мәселе тек бұрынғы бабына келуге байланысты.

"Оралу мерзіміне келсек - Шавкаттың кәсіби қызметін ары қарай жалғастырмауына ешқандай медициналық негіз жоқ. Мерзімі туралы... Бұл оның дене дайындығы бойынша жаттықтырушыларына байланысты сұрақ, бабына қаншалықты тез келетіні соларға мәлім. Сондай-ақ бұл UFC күнтізбесіне де байланысты. Мұнда бәрі жекелей сипатта. Келесі жылдың басында Шавкатты октагонда жарыс режимінде көреміз деп үміттенуге болады", - деді дәрігер.

Tengri Sport тілшісі Шавкаттың қазіргі жағдайы мен жаттығу жиыны туралы білу үшін қазақстандық спортшының бапкері Эдуард Базровқа хабарласты. Маман Рахмоновтың өзін жақсы сезінетінін, алайда жаттығу процесі әлі толық қарқынмен жүріп жатпағанын айтты.

Базровтың сөзінше, қазіргі уақытта Шавкат күрес әдістерін пысықтай алмайды және тек 60 пайыз күшпен жаттығуға мәжбүр.

"Тізенің айқас байламдарының жарақаты кезінде нәтиженің 50 пайызы - отаға, қалған 50 пайызы оңалту процесіне байланысты. Ота сәтті өтті, бәрін ауыстырды, бәрі бітіп, жазылды. Бірақ қалпына келу мерзімі әркімде әртүрлі. 6 айдан бір жылға дейін созылуы мүмкін. Ота қалыпты өтті, бірақ әлі көп жұмыс істеу керек болса, "шектеу жоқ" деп қалай айтуға болады: аяқты, бұлшықеттерді, буынның қозғалғыштығын қалпына келтіру қажет. Қазірше нақты ауыр жүктемелер бере алмаймыз. 60 пайызға ғана жаттығып жүрміз. Әзірге күресуге болмайды, мұндай аяқпен белгілі бір жүктемелерді беруге рұқсат жоқ", - деді Базров Tengri Sport-қа берген сұхбатында.

Сондай-ақ маман дәрігердің шектеулердің жоқтығы туралы пікірімен келіспеді. Эдуард Базровтың айтуынша, қазақстандық файтерге ұзақ уақыт қалпына келу және арнайы жаттығу жиындары қажет.

"Дәрігердің не айтқанын білмеймін, бірақ жаттықтырушы ретінде айтарым - аяғы әлі толық жазылған жоқ. Оның үстіне, толық айыққан күннің өзінде жаттығу жиындарын өткізу керек екенін ұмытпау қажет. Октагонға оралуды ойлау үшін кемінде 3 жиын өткізу керек, бұл шамамен 3 ай немесе 2,5 ай уақытты алады. Қазіргі кезеңде асығудың қажеті жоқ, өйткені жарақаты қайталануы мүмкін, сондықтан біз асықпай, бәрін жоспарлы түрде жасаймыз", - деп толықтырды бапкер.

Шавкат Рахмонов жаттығуға оралды

Еске сала кетейік, жеңіліс көрмеген қазақстандық спортшы тізесіне ота жасатып, қазір оңалтудан өтіп жатыр. Бапкері мен командасының айтуынша, Рахмонов жаттығуға қайта оралып, бабына келе бастаған.

Әлеуметтік желілерде Шавкат Рахмоновтың жаттығуынан фото мен видеолар жиі шыға бастады.

Жекпе-жектерге келетін болсақ, қазақстандық спортшы 2024 жылдың 8 желтоқсанында өткен UFC 310 турнирінен бері октагонға шыққан жоқ. Сол кезде ол төрешілердің бірауыздан қабылдаған шешімімен ирландиялық Иэн Гэрриді жеңген болатын.

Негізінде бұл Шавкат үшін чемпиондық жекпе-жек болуы керек еді, бірақ сол кездегі белбеу иесі Белал Мухаммад жарақатына байланысты айқастан бас тартты.