74 келіге дейінгі салмақ дәрежесіндегі әлем чемпионатының финалдық белдесуі 4:10 есебімен аяқталды. Қайпановтың айтуынша, бұл жекпе-жек оған оңайға соқпаған.
"Мен өз жанкүйерлерімізді алтын медальмен қуантқым келген еді. Бұған дейінгі күндері бауырларымыздың жеңілісі де психологиялық тұрғыда әсер еткен болуы мүмкін. Бірақ біз қайта ораламыз, алда әлі әлем чемпионаттары мен Олимпиада ойындары бар.
Жалпы бәрі жақсы сияқты еді, бірақ бозкілемге шыққанда ауыр болып кетті. Немесе жауапкершілікті тым көп арқалап жібердім бе... қол-аяғым жұмыс істемей қалды. Жеңілгенімді мойындаймын, енді бұдан да көп еңбек етеміз", - деді ол белдесу аяқталғаннан кейін микст-аймақта берген сұхбатында.
Айта кетейік, 2024 жылы Қайпанов 70 келіге дейінгі салмақта әлем чемпионы атанған болатын, кейін 74 келі салмаққа ауысып, Азия чемпионатының алтынын және Олимпиада ойындарының қоласын иеленді. Ал жаңа салмақ дәрежесінде әлем чемпионатының медаліне ол алғаш рет қол жеткізіп отыр.
Алдағы Олимпиада ойындарында еркін күрестен тек 74 келіге дейінгі салмақ дәрежесі ғана ұсынылады.
"Мен 70 келіде әлем чемпионы болғанмын, ал 74 келіде бұл – менің алғашқы медалім. Мұнда бәсекелестік жоғары. Алтын үшін дайындаламыз", - деп жауап берді Нұрқожа тілшіміздің сұрағына.
Қайпановтың қарсыласы әлем чемпионатының үздік балуаны деп танылды
Қайпановты жеңген 25 жастағы ресейлік Иналбек Шериев мансабында алғаш рет әлем чемпионы атанды. Еркін күрестен аңызға айналған жаттықтырушы Магомед Гусейновтың айтуынша, дәл осы Шериев - турнирдің үздік балуаны.
"Әлем чемпионатының ең мықты, ең техникалы балуаны! Жарайсың! Бәрімізді қуанттың! Әлем чемпионатының ең үздік балуанысың, ешкім саған жақындай да алмады!" - деді ол алтын медаль тапсырылғаннан кейін микст-аймақта.
Балуанның өзі жетістігі туралы пікір білдіріп, Олимпиада ойындарын жеңуді мақсат етіп қойғанын айтты:
"Әрине, сезімдерімді сөзбен айтып жеткізу мүмкін емес! Біз бұған ұзақ уақыт бойы, қиын да азапты жолмен келдік. Халқымның мақтанышымын ба? Білмеймін. Бұл атаққа әлі лайық емеспін деп ойлаймын. Алдын ала болжам жасамайық, бірақ Олимпиада чемпионы болғым келеді".
- Астанадағы әлем чемпионатының атмосферасы қалай екен?
- Қазақ бауырлар өте жоғары деңгейде өткізді! - деп жауап берді ол.
Қайпанов - 2026 жылғы ӘЧ-де финалға шыққан Қазақстанның жалғыз балуаны
Еске сала кетейік, 2026 жылғы күрес түрлерінен әлем чемпионатын Астана қаласы қабылдады. Қазақстан құрамасы турнирде 4 қола және бір күміс жүлде жеңіп алды.
Қайпанов ел намысын қорғағандардың арасынан финалға дейін жеткен жалғыз спортшы болды.
Айта кетейік, осыдан 7 жыл бұрын да өз елімізде өткен әлем чемпионатында Қайпанов финалға дейін жетіп, сол кезде де алтын ала алмаған еді. Қазіргі таңда оның қоржынында: әлем чемпионаттарының төрт медалі (оның ішінде 2024 жылғы алтын), Азия ойындарының қоласы және Азия чемпионатының үш жеңісі бар.