“Жай ғана хайп жинағысы келді“: шешен спортшысы Шавкат Рахмоновқа сес көрсетті

Жақында Ислам Дулатовтан бабында тұрған кезінде кім мықты екенін сұраған: ол ма, әлде жеңіліп көрмеген қазақстандық Шавкат Рахмонов па?

Файтер Рахмоновты құрметтейтінін, бірақ оның айтарлықтай нәтиже көрсете қоймағанын айтып, жекпе-жек өткізсе, оны жеңе ете алатынын жеткізді.

"Бабымда болсам, мен сөзсіз Ислам Дулатовты (өзін) таңдаймын. Шавкат әзірге - мен оған құрметсіздік танытып немесе жетістіктерін кемсіткім келмейді - бірақ менің көзімде ол шынымен де сондай деңгейде деп айтатындай таңғаларлық ештеңе көрсеткен жоқ. Оның жекпе-жектері жақсы, бірақ мен де қарсыластарымды мерзімінен бұрын жеңіп, жақсы кездесулер өткізіп жүрмін. Сондықтан екеуіміздің біріміз мерзімінен бұрын жеңіледі деп ойлаймын. Егер мен бабымда болсам, ол жеңіледі", - деді Дулатов.

Tengri Sport тілшісі қазақстандық жұлдыздың бапкері Эдуард Базровпен хабарласты. Ол файтерлердің деңгейі мүлдем бөлек екенін айтып, Дулатов Рахмоновтың есімін тек хайп үшін пайдаланды деген пікір білдірді.

"Ол модель ғой. Киім жарнамалайды, подиумда жүреді, сосын барып UFC-де төбелеседі. Ол жай ғана сөйлеп тұр. Іске келгенде бәрі басқаша болады. Бізге ол сияқты файтерлер қызық емес. Ол рейтингте нешінші орында өзі? Қайда төбелесіп жүр? Қайдан түскен адам өзі? Меніңше, ол жай ғана Шавкаттың есімін атап, соның арқасында танымал болғысы келді. Неше түрліні айта береді. Мұндай құр сөйлейтін адамдар әлі көп болады", - деп жауап берді Базров.

Ислам Дулатов деген кім?

Ислам Дулатов - шешен-неміс аралас жекпе-жек шебері. 1998 жылы 2 тамызда Урус-Мартанда (Шешенстан) дүниеге келген. 2007 жылы отбасымен бірге босқын ретінде Германияға көшіп, Дюссельдорфта өскен. Қазіргі уақытта UFC-де Түркия туы астында өнер көрсетеді.

Кәсіби рекорды - 12-1, барлық жеңісіне мерзімінен бұрын қол жеткізген. 2024 жылдың қазанында Dana White’s Contender Series (DWCS) турнирінде жарқын өнер көрсетті. Оның қарсыласы LFA-ның бұрынғы чемпионы, тәжірибелі бразилиялық Ванилтон Антунес болды.

Дулатов алғашқы секундтардан-ақ алға ұмтылып, қолмен белсенді жұмыс істеп, қысым көрсетті. Бірінші раундтың ортасында ол Антунесті торға тақап, кейін түрегеп тұрып шынтақпен жойқын соққы жұмсады. Соққы дәл самайға тиіп, бразилиялық ес-түссіз құлады. Төреші жекпе-жекті бірінші раундтың 2:44 минутында тоқтатты.

Бұл нокаут Дана Уайтқа қатты әсер етті. Ол бірден Дулатовқа UFC-мен келісімшарт ұсынды.

Дулатов UFC-дегі кәсіби дебютін 2025 жылғы 19 шілдеде Жаңа Орлеандағы (Луизиана штаты, АҚШ) "Smoothie King Center" аренасында өткен UFC 318 турнирінде жасады. Қарсыласы америкалық Адам Фюгитт болды.

Фюгитт екінші нөмірмен жұмыс істеп, күреске түсуге тырысты, алайда Дулатов қашықтықты сенімді бақылап, тік соққылар мен лоу-киктер бағыттады. Бірінші раундтың төртінші минутында Ислам қарсыласын сол жақтан дәл чек-хукпен қарсы алды. Фюгитт құлап, Дулатов оны бірден партерде соққының астына алып, жеңісті жұлып алды.

Осы жеңісі үшін Дулатов "Кештің үздік өнері" бонусын алды.

Шешен файтері модельдік мансабын қатар алып жүр

Жекпе-жектермен қатар Ислам модель ретінде де табысты жұмыс істейді. Ол Versace (соның ішінде эксклюзивті келісімшарт пен Сән апталықтарындағы көрсетілімдер), Gucci, Lanvin, Tommy Hilfiger, Hugo Boss және басқа да брендтермен жұмыс істеген. 2018 жылы British Vogue оны ең перспективалы он ер модельдің тізіміне қосты.

Шавкат Рахмоновтың жекпе-жекке шықпағанына 662 күн болды

Еске сала кетейік, жеңілмеген қазақстандық Шавкат Рахмонов 2024 жылдың 8 желтоқсанында өткен UFC 310 турнирінен бері жекпе-жекке шықпады. Ол кезде Шавкат төрешілердің бірізді шешімімен ирландиялық Иэн Гэрриді жеңген болатын.

Бастапқыда бұл жекпе-жек Шавкат үшін чемпиондық айқас болуы тиіс еді, бірақ сол кездегі белбеу иегері Белал Мухаммад жарақатына байланысты кездесуден бас тартты. Кейінірек Рахмоновтың өзі де жарақат алғанын мәлімдеп, чемпиондық атаққа таласа алмады.

Қазақстандық спортшы біраз уақыт бойы өнер көрсетпегендіктен, оны UFC рейтингінен шығарып тастады.