“Жыртылған алаң“: Канье Уэсттің кесірінен “Қайрат“ Түркістанда қандай қиындыққа тап болады?

Чемпиондар лигасы іріктеу кезеңінің үшінші раундындағы алғашқы ойында алматылықтар сырт алаңда 1:0 есебімен жол берді. Алматыда рэпер Канье Уэстің концерті жоспарлануына байланысты команда қарымта матчтегі өз алаңының артықшылығынан айырылды - дәл осы себепті Чемпиондар лигасының маңызды ойыны Түркістанда өтеді.

Түркістан облысы әкімдігінің мәліметінше, қала жауапты матчті қабылдауға дайын. Дегенмен, құны 39 миллион доллар болатын арена алаңының жағдайы көптің көкейінде сауал қалдырды.

Мәселен, "Қайрат" матчінің алдында осы аренада өткен "Атырау" мен "Ақтөбе" арасындағы чемпионат ойынының трансляциясы кезінде Түркістандағы табиғи көгалдың бірнеше кемшілігі байқалды.

Атап айтқанда, қақпашы алаңы топырағы көрінгенше тапталып қалған.

Скриншот: матч трансляциясы

Ал кейбір кадрлардан көгалдың жабыннан кесек-кесегімен бөлініп жатқаны көрінеді, видео астындағы жанкүйерлер де алаңның сапасы сын көтермейтінін айтып жатыр.

"Көгал емес, жыртылған атыз сияқты. "Қайрат" қалай ойнайды?" - деп жазды пікір қалдырушылардың бірі.

Скриншот: матч трансляциясы

Айта кетейік, биыл "Түркістан Аренада" "Тұранның" ерлер және әйелдер командаларынан бөлек, "Атырау" да өз ойындарын өткізіп жүр. Бұдан бөлек, бұл стадион "Ақтөбе" үшін де уақытша үй аренасына айналды.

Tengri Sport-тың көгал сапасына қатысты сауалына "Қайрат" клубы стадион қызметкерлеріне ешқандай шағымдары жоқ екенін айтып жауап берді.

"Алдымен, "Түркістан Арена" стадионының басшылығына және Түркістан облысының әкімдігіне қонақжайлылық танытып, барлық қалалық қызметтер тарапынан матчті өткізуге атсалысқаны үшін алғыс айтамыз. Олар өз тарапынан көгалды дайындау үшін қолдан келгеннің бәрін жасады: басқа командалардың жаттығу санын азайтып, әйелдер командасының матчін басқа уақытқа ауыстырды.

Аптап пен бірнеше команданың жүктемесі жағдайында алаңды мінсіз күйде сақтау оңай емес екені түсінікті. Соған қарамастан, көгалды біздің ойынға барынша сапалы дайындау үшін үлкен жұмыс атқарылды", - деп мәлімдеді клуб өкілдері.

Еске сала кетейік, "Қайрат" - "Левски" матчі 11 тамызда Түркістанда өтеді және Қазақстан уақытымен сағат 20:00-де басталады.