“Қайрат“ футбол клубының бұрынғы капитаны өмірден озды

Бүгін Алматының «Қайрат» клубының бұрынғы шабуылшысы әрі капитаны Сергей Рожковтың өмірден өткені белгілі болды. Қазақстан футболының ардагері 84 жасқа қараған шағында дүниеден озды, деп хабарлайды Tengri Sport клубтың баспасөз қызметіне сілтеме жасап.

Футболшының қайтыс болғаны туралы ақпарат алматылық клубтың әлеуметтік желідегі парақшаларында жарияланды. "Қайрат" ұжымы Сергей Егоровичтің туған-туыстары мен жақындарына, достарына, бұрынғы командаластарына және оны таныған барша жанға көңіл айтты.

"Сергей Егорович 1966–1967, 1970–1973 және 1975–1976 жылдары “Қайрат” сапында өнер көрсетті. Алматылық клуб құрамында 203 матч өткізіп, 25 гол соқты. Команда капитаны болды, өз буынының жарқын өкілдерінің бірі еді. Сергей Егорович біздің клуб пен Қазақстан футболының тарихында өшпес із қалдырды", — делінген клуб хабарламасында.

1971 жылы Сергей Рожков «Қайрат» құрамында Халықаралық теміржолшылар спорт одағы кубогын жеңіп алды.

Рожков — КСРО спорт шебері, ел чемпионы және Кубоктың екі дүркін иегері. Сондай-ақ ол ұлттық құрама сапында екі матч өткізген.

Еске сала кетейік, наурыз айының басында қырғызстандық 77 жастағы бапкер Борис Подкорытовтың қайтыс болғаны хабарланған еді. Ол 1990 жылдардың ортасында Қазақстан ұлттық құрамасының жаттықтырушылар штабында жұмыс істеген.