Бергамода өткен "Аталанта" - "Қайрат" матчі 1:1 есебімен тең аяқталды. Қазақстандық команда Марк Гуальдың күшімен есеп ашқанымен, Никола Крстович 82-минутта ғана жауап қатты.
Италиялық БАҚ, ең алдымен, "Қайраттың" қорғаныстағы жинақылығын, сондай-ақ гол соғуға септігін тигізген "жойқын қарсы шабуылын" атап өтті.
"Бүгінгі матч, негізінде, оңай болған жоқ: қазақстандық команда өз алаңының жартысында қорғаныс қамалын тұрғызды, ал бірінші таймда "Аталанта" қолайлы сәттерді қиындықпен іздеді", - деп жазады италиялық Eurosport.
"Екінші таймда "Аталанта" қазақстандықтардың жойқын қарсы шабуылынан гол өткізіп алды: Эдмилсонның тамаша пасы испандық Гуальды Карнесеккимен жеке шығарды, ол мүлт кетпеді. Анарбековтің уақытынан бұрын шығуы Обричке пас беруге мүмкіндік беріп, Крстович допты қақпаға торлағанға дейін, "Аталанта" нақты қауіп төндіре алмай, қазақстандық қорғанысты бұзып өте алмады", - деп толықтырады басылым.
Жанкүйерлердің наразылығы мен қателік жасаудан қорқу
Тағы бір италиялық Italpress басылымы матчке жасаған талдауында тіпті жеңілістен аман қалудың өзі трибунадағы "Аталанта" жанкүйерлерінің ысқырығын тоқтата алмағанын жазды.
"Тең есеп наразылықты сейілткен жоқ. "Аталанта" мен "Қайрат Алматы" кездесуді 1:1 есебімен аяқтады, екінші таймның 37-минутында Крстович соққан гол бүкіл бергамолық көрерменнің наразы ысқырығына бөгет бола алмады", - деп жазады БАҚ.
Бұдан бөлек, Italpress қазақстандық команданың шыдамдылығы мен "Аталанта" көшбасшыларының қобалжуын атап өтеді.
"Қайрат" өз сәтін шыдаммен күтті. Ойынның алғашқы жарты сағаты аяқталар тұста екі бірдей қауіпті сәт "Аталантаны" састырып қойды. Алаң иелері дәлдік таныта алмай, кездесу барысын өзгертуге бағытталған көзге түсерлік әрекет те жасай алмады.
31-минутта қазақстандық команданың айып алаңындағы қысқа комбинациядан кейін Пашалич түсініксіз түрде қақпадан қиыс тепті. Бұл қателік команда үшін қиын сәтте мүлт кетуден қорыққандықтың салдары болды", - деп жазады басылым.
"Дәмсіз сорпаның дәмін татты"
Италияның ең беделді спорттық басылымдарының бірі Tuttosport "Аталантаның" ойынын дәмсіз қазақ сорпасын ішумен теңеді.
"Аталанта үшін дәмсіз қазақ сорпасы. Құтқарғаны үшін Крстовичке рақмет", - деп тақырып қойылған материалға.
Одан әрі метафораға қысқаша түсінік беріледі: "Сорпа - бұл дәстүрлі қазақ сорпасы. Қатарынан бес жеңілістен кейін, 24 күн ішіндегі сегізінші матчінде "Аталанта" оның дәмсіз нұсқасынан дәм татты, бұл ас олардың өңешіне тұрып қала жаздады", - дейді мақала авторы.
"Аталантамен" тең түсу неге кішігірім сенсация?
Командалардың деңгейіндегі айырмашылықты Transfermarkt порталындағы футболшылардың құны айқын көрсетеді. Сайт италиялық клубты 449 миллион еуроға бағаласа, алматылықтардың құны небәрі 9,2 миллионды құрайды.
"Аталантаның" ең қымбат ойыншысы - бразилиялық жартылай қорғаушы Эдерсон — 40 миллион еуро тұрады, ал ең қымбат 15 ойыншының кез келгені 10 миллиондық межеден асады.
Бағадан бөлек, клубтың еурокубоктық тәжірибесі де зор - "Аталанта" Чемпиондар лигасында сан мәрте өнер көрсетіп, небәрі екі жыл бұрын еуропалық трофейді жеңіп алған.
Айта кетейік, осы тең ойынның арқасында "Қайрат" Конференция лигасының додасында екінші ұпайын еншіледі. Команда үш турдан кейін 27-орында тұр және плей-офф кезеңіне шығу мүмкіндігін сақтап қалды.
Келесі матчте алматылықтар 26 қарашада өз алаңында Швецияның "Мьельбю" клубын қабылдайды.
Бұған дейін футболдан Қазақстан құрамасының аңызы Қайрат Нұрдәулетов Криштиану Роналдудың ұлттық құрамадағы мансабын аяқтауына қатысты пікір білдірген болатын.