Қазақстан ӘЧ-дағы тарихи жетістіктен кейін әлемдік рейтингте көтерілді

Үстел теннисінен Қазақстан ерлер құрамасы командалық Әлем чемпионатындағы өнерінің қорытындысы бойынша әлемдік рейтингте жеті сатыға көтерілді, деп хабарлайды Tengri Sport Қазақстан үстел теннисі федерациясына сілтеме жасап.

Халықаралық федерация әлемдік рейтингтің жаңа нұсқасын жариялады. Қытай құрамасы көш басындағы орнын сақтап қалды.

Қазақстандық ерлер командасы 25-орыннан 17-орынға, ал әйелдер командасы 37-орыннан 31-орынға көтерілді.

Айта кетейік, мұндай серпіліс командалық Әлем чемпионатындағы сәтті өнердің арқасында мүмкін болды.

Қос команда турнирдің плей-офф кезеңіне шықты, ал ерлер құрамасы 1/16 финалда испандықтарды жеңіп, әлемдік додаларда өнер көрсетуден жаңа рекорд орнатты.

Нәтижесінде ерлер командасы турнирде 9-орынға, ал әйелдер командасы 17-орынға табан тіреді. Бұл екі команда үшін де тарихтағы ең үздік нәтиже.

Қазақстандық пинг-понгтың басты жұлдызы

29 жастағы Кирилл Герасименко көп жылдан бері Қазақстан құрамасының басты жұлдызы болып келеді.

2024 жылы ол қатарынан үшінші Олимпиадасына қатысып, 1/8 финалға дейін жетті және ел рекордын жаңартып, қорытындысында тоғызыншы орын алды.

Кирилл Германияда тұрып, жаттығады, SV Werder Bremen сапында өнер көрсетеді.

Бұған дейін Рыбакина әлемдік рейтингте Соболенкоға жақындап қалғаны хабарланған болатын.

Ал футболдан Қазақстан құрамасы ФИФА рейтингінде бір саты жоғарылады.