Қазақстан әлем чемпионатында көшбасшы болуға күреседі: матчті қайдан және қашан көруге болады?

Бүгін, 5 мамырда, хоккейден Қазақстан құрамасы бірінші дивизиондағы әлем чемпионатында үшінші матчін өткізеді. Талғат Жайлауов шәкірттерінің қарсыласы Польша құрамасы болады, - деп хабарлайды Tengri Sport.

Алғашқы екі турдан кейін қазақстандық хоккейшілер турнирлік кестеде жеке дара көш бастап тұр және басымдықты нығайтуға мүмкіндігі бар.

Польша құрамасы алғашқы турларда Украина командасын негізгі уақытта жеңіп, Франция командасына буллит сериясында есе жіберіп, төрт ұпай жинады.

Осылайша, Польша да, Қазақстан да өзара кездесуден кейін кестеде көш бастауы мүмкін немесе көшбасшылықты украиндарға қарсы ойнайтын француздарға беруі ықтимал.

Қазақстан - Польша: тікелей трансляция

Хоккейден бірінші дивизиондағы әлем чемпионатының Қазақстан - Польша матчі бүгін сағат 22:30-да басталады. Ойынды Qazsport арнасы, сондай-ақ Хоккей федерациясы сайты тікелей эфирде көрсетеді.

Қазақстан құрамасы әлем чемпионатында: нәтижелер

Еске сала кетейік, турнирдің Литва командасына қарсы алғашқы матчінде Қазақстан құрамасы екі кезең бойы 0:1 есебімен ұтылып тұрып, ойын барысын өзгертіп, ірі есеппен (4:1) жеңіске жетті.

Екінші кездесуде қазақстандықтар бұдан да сенімдірек басым түсті – жапондар бірде-бір шайба соға алмады, ал Жайлауов командасы 6:0 есебімен жеңіске жетті.