Ойынның алғашқы кезеңінде есеп ашылған жоқ. Талғат Жайлауовтың шәкірттері қарсылас қақпасына 20 рет соққы бағыттағанымен, шайба соға алмады.
Матчтегі алғашқы шайба екінші кезеңнің екінші жартысында, 11-минутта соғылды. Саян Данияр қарсылас команда бір ойыншыға кем қалған сәтті тиімді пайдаланып, есеп ашты. Араға үш минут салып, ол тағы бір шайба соғып, дубль авторы атанды.
Үшінші кезеңде Қазақстан құрамасы шабуылын жалғастырды. Кезең басталғаннан кейін небәрі 33 секунд өткенде Артур Гатиятов есепті 3:0-ге жеткізді. Ал 8-минутта Оскар Юлбарисов төртінші шайбаны қарсылас қақпасына дәл бағыттады.
Матчтің 13-минутында Кирилл Никитин сан басымдығын пайдаланып, бесінші шайбаны соқты.
Ойын Қазақстан құрамасының жеңісімен аяқталды, есеп - 5:0.
Айта кетейік, Азия чемпионатындағы Қазақстан құрамасының сапында "Барыс" клубынан тек қақпашы Владислав Нурек өнер көрсетіп жүр. Қалған ойыншылар Қазақстан чемпионатына қатысатын клубтардан жасақталған.
8 қарашада Қазақстан құрамасы турнирдегі шешуші кездесуін Оңтүстік Кореяға қарсы өткізеді. Биыл қазақстандық хоккейшілер былтыр жеңіп алған Азия чемпионы атағын қорғап жатыр.