Қазақстан бокстан әлем чемпионының айыптауларына жауап берді

Бұған дейін Шираз қазақстандық боксшы Жәнібек Әлімханұлының супер орта салмақтағы әлем чемпионы атағына міндетті үміткер болып тағайындалуының артында WBO-дағы жемқорлық тұруы мүмкін деп мәлімдеген болатын. Оның пікірінше, қазақстандық спортшы 2025 жылғы желтоқсандағы допинг жанжалынан кейін титулдық жекпе-жекке шығу құқығын алмауы тиіс еді.

"Қазақстан кәсіпқой бокс федерациясының президенті ретінде мен Дүниежүзілік бокс ұйымының (WBO) шешімі төңірегіндегі медиалық манипуляцияларға нүкте қойып, Хамза Шираз командасының мәлімдемелеріне толыққанды құқықтық баға беру қажет деп санаймын.

Кәсіпқой бокста ережелер, регламент және институционалдық органдардың шешімдері популистік талқылаулардың нысаны болмауы тиіс. ҚКБФ WBO әрекеттерінің толық құқықтық заңдылығын мәлімдейді және осы істің негізгі аспектілерін атап көрсетеді", - деді федерация басшысы біздің сауалымызға берген жауабында.

Ерденбековтің айтуынша, қазақстандық ұйым бұған дейін Әлімханұлының шеттетілу мерзімін өзгерту үшін барлық негіздемелерді дайындаған, бұл оны міндетті үміткер етіп тағайындауға себеп болған.

"Дәл ҚКБФ Тәртіптік комиссиясы лицензиатқа тікелей юрисдикциясы бар ұлттық бокс комиссиясы ретінде Жәнібек Әлімханұлының ісіне алғашқы жан-жақты құқықтық және медициналық аудит жүргізді.

Комиссия бұл жағдайды халықаралық No Fault or Negligence / No Significant Fault (кінәнің немесе салғырттықтың болмауы) принципі бойынша саралады. Бұл ретте заттың өте аз концентрациясы, фармакологиялық артықшылықтың болмауы, спортшының тергеумен толық жұмыс істеуі және оның мінсіз допинг тарихы ескерілді.

Осы негізде ҚКБФ Тәртіптік комиссиясы ішкі санкциялар мерзімін аяқтау туралы дәлелді шешім қабылдады.

WBO Атқарушы және құқықтық комитеттерінің Әлімханұлын қалпына келтіру және оны міндетті үміткер етіп тағайындау туралы шешімі WBO Ережелерінің 14-бөліміне (WBO Regulations for World Championship Contests) негізделген.

Бес рет титулын сәтті қорғаған қазіргі біріктірілген чемпион (WBO/IBF) ретінде Әлімханұлының салмақ дәрежесін ауыстырған кезде чемпиондық жекпе-жекке үміткер болуға тікелей регламенттік құқығы бар", - деп есептейді Ерденбеков.

"Қауіпті прецедент" - ҚКБФ басшысы Шираздың мәлімдемесі туралы

Рақымжан Ерденбеков өз жауабында WBO-ны айыптау - құқықтық сауатсыздықтың көрінісі екенін баса айтты.

"Біз британдық тараптың міндетті қорғаудан жалтару үшін спорттық саясатты, популизм мен протекционистік қысым құралдарын қолдануға тырысып жатқанын көріп отырмыз. Баспасөз арқылы ҚКБФ Тәртіптік комиссиясы мен WBO басшылығының шешімдерін құнсыздандыру әрекеттері әлемдік бокстың институционалдық негіздеріне нұқсан келтіретін қауіпті прецедент тудырады.

Медиадағы шу спорттық тәртіпті алмастыра алмайды. Жәнібек Әлімханұлы барлық құқықтық және процедуралық талаптарды толық орындады, қажетті тексерулерден өтті және өзінің шеберлігін дәлелдеуге дайын.

Мен Хамза Шираздың промоутерлік тобын WBO нормативтік шешімдерін деструктивті түрде саясиландыруды тоқтатып, келісімшартты мақұлдауға көшуге және чемпиондық белдіктің тағдырын шешілуі тиіс жерде - шаршы алаңда шешуге шақырамын", - деді ол.

Шираз Әлімханұлымен жекпе-жектен бұрын да қашуға тырысқан

Еске сала кетейік, британдық Хамза Шираз Жәнібек Әлімханұлымен орта салмақта-ақ кездесуі мүмкін еді. Ол кезде де қазақстандықтың титулына міндетті үміткер болған, бірақ соңында жекпе-жектен жалтарып, басқа ұйымның белдігін иеленуге тырысты және салмақ дәрежесін ауыстырды.

Орта салмақта WBO және IBF нұсқалары бойынша белбеулерге иелік еткен қазақстандық боксшы желтоқсан айының соңындағы допинг жанжалынан кейін титулдарынан айырылған болатын, бірақ енді ол супер орта салмаққа көтеріліп, қайтадан әлем чемпионы атану мүмкіндігіне ие болды.

WBO өткен аптада Әлімханұлын міндетті үміткер етіп тағайындап, боксшылардың командаларына келіссөздер жүргізу үшін 20 күн уақыт берді.

Осыдан кейін Шираз шулы сұхбат беріп, ұйымды жемқорлықпен айыптады.

Әлем чемпионы Жәнібек Әлімханұлына қатысты шешім үшін WBO-ны айыптады