Қазақстан Бразилияны ұтып, Әлем чемпионатының тарихи медалін иеленді

Фото: ҚР Туризм және спорт министрлігі

Параволейболдан Қазақстан құрамасы Әлем чемпионатының қола жүлдегері атанды. Үшінші орынға таласта отандастарымыз Бразилия командасын жеңді, деп хабарлайды Tengri Sport Туризм және спорт министрлігіне сілтеме жасап.

Волейболды отырып ойнаудан Әлем чемпионаты 10-17 шілде аралығында Қытайдың Ханчжоу қаласында өтті. Қазақстандық волейболшылар өз тобында екінші орын иеленіп, жартылай финалға жеңіліссіз жетті. Тек жартылай финалда Әлем чемпиондары Ирак құрамасына есе жіберді.

Қола медаль үшін тартысты бәсекеде біздің команда Бразилия құрамасын 3:2 есебімен ұтты.

"Бұл қола жүлде – волейболды отырып ойнаудан Қазақстан құрамасының Әлем чемпионаттары тарихындағы алғашқы марапаты және отандық параспорттың тарихи жетістігі", - деді ведомствоның баспасөз қызметі.

Еске сала кетейік, волейболды отырып ойнаудан Қазақстан құрамасы кейінгі жылдары айтарлықтай табысқа қол жеткізді. Мәселен, өткен Паралимпиада ойындарына команда өз тарихында алғаш рет лицензия иеленген болатын.

Команда үшін келесі ірі жарыс - 2026 жылдың күзінде өтетін жазғы Азия Пара ойындары.

Тарихи чемпион Қазақстандағы протез мәселесі туралы айтты: министрлік жауабы

Тағы оқыңыз: Азия чемпионатында Қазақстанның әнұраны қосылмай қалды: құрама оны өздері айтып шықты