“Қазақстан еуропалық елдер деңгейіне жете алады“: құрама бапкері стадиондар туралы пікір білдірді

Фото © Tengrinews.kz / Әлихан Сариев

Футболдан Қазақстан ұлттық құрамасының жаңа бас бапкері, нидерландтық Джон ван’т Шкип елдегі инфрақұрылымға баға берді, деп хабарлайды Tengri Sport Қазақстан футбол федерациясының баспасөз қызметіне сілтеме жасап.

Тағайындалғаннан кейінгі үш апта ішінде ұлттық құраманың жаңа тәлімгері Түркістан, Семей және Қазақстанның басқа да футбол қалаларын аралап үлгерді. Оның айтуынша, елде инфрақұрылым тұрғысынан дамитын бағыттар бар.

"Қазір өте қысқа уақыт ішінде көптеген матчке барып үлгердім. Менің ойымша, чемпионат жақсы деңгейде және жақсы ұйымдастырылған. Стадиондар мен инфрақұрылым туралы айтатын болсақ, Қазақстанның басқа еуропалық елдердің деңгейіне жақындауы үшін әлі де дамитын бағыттары бар. Дегенмен бұл бағытта жұмыс жүргізіліп жатқанын көріп отырмын.

Әрі қарай дамуға мүмкіндік бар екені жақсы. Айырмашылықты қысқарту үшін клубтар мен мемлекет осы бағытта жұмысты жалғастырады деп үміттенемін. Бұл чемпионаттың өзі үшін де, отандық футболшылар үшін де маңызды", - деді маман.

Еске сала кетейік, Джон ван’т Шкип нидерландтық "Аякс", сондай-ақ "Мельбурн Сити" (Аустралия) клубтарында және Грекия мен Армения құрамаларында жаттықтырушы болып қызмет атқарған.

7 тамызда ол Қазақстан құрамасының бас бапкері лауазымында Талғат Байсуфиновты алмастырғаны белгілі болды.

Қазақстанда 30 жылда қанша стадион салынды?

Еске сала кетсек, Тәуелсіздік алғаннан бері Қазақстанда үш жаңа стадион салынды: "Астана арена" (30 мың адамға арналған), "Түркістан арена" (7 мың орын) және Қызылордадағы "Қайсар арена" (11 мың орын).

Фото: Ақорда баспасөз қызметі

Сонымен қатар елордадағы Мұңайтпасов атындағы ескі стадионның орнына 3 мың 600-ге жуық адамды сыйдыра алатын жабық манеж тұрғызылды.

Фото © Tengrinews.kz / Маржан Қуандықова

Ел аумағында жаңа стадиондар бой көтереді

Жаздың басында Туризм және спорт министрлігі Алматы, Шымкент, Ақтөбе, Атырау және Семейде жаңа ареналар салу жұмыстары жүргізіліп жатқанын хабарлаған болатын.

Алматыдағы стадионның сыйымдылығы 45 мың адамға жетуі мүмкін, бұл оны елдегі ең үлкен стадионға айналдырады.

Фото: алдын ала эскиз, өзгерістер болуы мүмкін, Алматы әкімдігі

Бұдан бөлек, тағы 7 арена бойынша жобалау-сметалық құжаттама (ЖСҚ) әзірленіп жатыр. Ведомствоның ақпараты бойынша, жаңа ареналар Петропавл, Ақтау, Қарағанды, Өскемен, Қонаев, Көкшетау және Павлодарда салынады.

Қазақстанда қандай ірі стадиондар бар?

Үш жаңа аренадан бөлек, елімізде сыйымдылығы 15 мың адамнан асатын үш стадион бар: Алматыдағы "Орталық" стадион (23 мың 800 орын), Қарағандыдағы "Шахтер" (19 мың орын) және Шымкенттегі Қажымұқан атындағы Орталық стадион (18 мың орын).

Айта кетейік, Мемлекет басшысы Қасым-Жомарт Тоқаев Бурабайда өткен IV Ұлттық құрылтайда "демеушілер қаржысы есебінен облыстық стадиондардың көпшілігін жаңғырту қажет немесе жаңа футбол стадиондарын салуды қолға алған жөн" деп айтқан болатын.

Еуроны жеңіп, “Аякста“ жұмыс істеген: Қазақстан құрамасының жаңа бапкері туралы не белгілі?