Қазақстан құрамасы әлем чемпионатына “Барыс“ ойыншыларынсыз бара ма: сарапшы пікірі

Құрлықтық хоккей лигасының (ҚХЛ) күнтізбесіне сәйкес, плей-оффтың шешуші кезеңдері Қазақстан құрамасы жолдама алған элиталық дивизиондағы әлем чемпионатының мерзімімен тұспа-тұс келіп тұр.

Хоккейден әлем чемпионаты 2027 жылы 14–30 мамыр аралығында Германияда өтеді, ал ҚХЛ-да тек 7 мамырда ғана жартылай финалдық кезең аяқталуы мүмкін. Осылайша, Қазақстан құрамасының үздік ойыншылары әлем біріншілігіне дайындалуы үшін "Барыс", "Металлург", "Адмирал" және "Торпедо" клубтары 1/4 финалдан әрі өтпеуі тиіс.

Сарапшының айтуынша, хоккейшілерге клуб намысын қорғауға басымдық берген жөн.

– Сонда "Барысқа" құрама үшін плей-оффтың жоғары сатысында әдейі жеңілуге тура келмей ме?

– Егер әлем чемпионатына Pro Hokei Ligasy немесе ЖХЛ (ВХЛ), Солтүстік Америкадағы жігіттер, тіпті U-20 құрамасы барса, мен тек қуанамын. Жігіттер барып, орасан зор тәжірибе жинап қайтады.

– Ал элитада қалу міндеті ше?

– Элитада қалдық дейік, бұдан не ұттық?

– Үш жыл қатарынан өнер көрсету жағымды болды ғой.

– Иә, элитада үздіктермен ойнаған жақсы. Бірақ мен өткен әлем чемпионатында норвегиялықтардың ойынынан ләззат алдым. Оларды сегіздікке 100 пайыз кірмейді деп ойлағанмын, бірақ ол жаққа 17–18 жастағы жасөспірім келеді де, алдымен U-20 үшін әр матчте гол соғады, сосын ересектер арасындағы әлем чемпионатына келіп, тағы бес-алты шайба салады. Сонда "Бұл не қылған құбыжық?" деп таңғаласың. Міне, нағыз талант. Сондықтан біздің құрамада да осындай тұлғалардың шыққанын қалаймын, – деп атап өтті ол.

Олейниктің сөзінше, клуб пен құраманы таразы басына қоюдың қажеті жоқ.

"Егер "Барыс" алысқа барса, бұл біз үшін керемет болады. Ковид болған жылғы нәтижені қайталап қана қоймай, одан асып түссек деймін. Команданы нақ шешуші кезеңдерде көргім келеді, финал туралы армандаймын. Финалда жұмыс істеу – менің арманым.

Клуб пен құраманы бір таразыға қоюға болмайды, бұл дұрыс емес. Мұндай қадам тек кері әсерін тигізетінін тәжірибе көрсетті. Жігіттердің осында өсіп-жетілгені өте жақсы. Егер "Барыстың" жоғары кезеңдегі ойындары мен құраманың әлем чемпионатындағы қатысуы тұспа-тұс келсе, Пролига мен жастар құрамасының жігіттері бара берсін. Барлығы тек "Барысқа" ғана байланысты емес екенін көрсетейік", – деді ол.

Айта кетейік, "Барыс" өз тарихында ешқашан Гагарин кубогінің жартылай финалына шығып көрген емес, команданың ең жоғарғы көрсеткіші – 1/4 финал. Сонымен қатар астаналық ұжым соңғы төрт маусымда конференцияның үздік сегіздігіне ене алмай, плей-оффтан тыс қалды.

Ал хоккейден Қазақстан құрамасына келсек, команда екі жыл бұрын элиталық дивизионнан ұшып кеткен болатын, алайда бірінші дивизионның А тобындағы барлық матчте жеңіске жетіп, алғашқы талпыныстан-ақ қайта оралды. Бұл ретте команда көшбасшылары – Никита Михайлис пен Валерий Орехов ҚХЛ плей-офф кезеңінде "Металлург" сапында өнер көрсетіп, турнирге қатыспаған еді.