Қазақстан құрамасы әлем чемпионатында қарсыласын ойсырата жеңді

18 жасқа дейінгі Қазақстан хоккей құрамасы А тобының бірінші дивизионындағы әлем чемпионатында Польша командасын ойсырата жеңді, деп хабарлайды Tengri Sport.

Қазақстандық команданың турнирдегі екінші матчі 10:2 есебімен аяқталды. Бұл ретте хоккейшілеріміз алғашқы болып гол өткізіп алды, ал екі кезеңнен кейін басымдық тек бір шайба болды.

Шешуші кезеңде қазақстандықтар турнир қожайындарының қақпасына жауапсыз жеті гол соғып, матч ірі есеппен аяқталды.

Поляктарды жеңу Қазақстан үшін турнирдегі екінші жеңіс болғанын айта кетейік. Алғашқы матчте Венгрия құрамасы (5:2) жеңілген болатын.

Естеріңізге сала кетейік, бірінші дивизионда командалар элиталық дивизионға қайта оралу үшін бақ сынайды. 2024 жылғы мамырда Қазақстан буллиттер сериясында Норвегияға есе жіберді, ал былтыр бес ойынның үшеуінде жеңіліп, қайта орала алмаған еді.

Ұлттық құрама да элитаға оралуға дайындалып жатыр

2 мамырда бірінші дивизиондағы әлем чемпионатында Қазақстанның ересектер құрамасы өнер көрсете бастайды. Турнир Польшада өтеді.

Қазақстан құрамасының бас жаттықтырушысы Талғат Жайлауов команданың ашық жаттығуы кезінде бұл турнирдегі мақсат - барлық матчтерде жеңіске жетіп, элитаға оралу екенін мәлімдеді.