Қазақстан құрамасы Азия пара ойындарының ашылу салтанатына қатысты

Жапониядағы Азия пара ойындарының ашылуы. Фото: Қазақстан Паралимпиада комитеті/ Аян Несіпбеков

Жапонияның Нагоя қаласында V Азия пара ойындарының (Айти – Нагоя – 2026) ашылу салтанаты өтті. Ұлттық делегациялар шеруіне Қазақстан құрамасының өкілдері де қатысты, - деп хабарлайды Tengri Sport.

Салтанатты шара 18 қазанда Мидзухо саябағындағы жеңіл атлетика стадионында ұйымдастырылды.

Қазақстанның мемлекеттік туын ұстап шығу мәртебесіне Париждегі Паралимпиада ойындарының қола жүлдегері, пара жеңіл атлет Дастан Мұқашбеков пен парадзюдодан әлем чемпионаттарының бірнеше дүркін жүлдегері Аяла Мереке ие болды.

Жарыс 18-24 қазан аралығында спорт арқылы бірлік идеясын паш ететін Imagine One Heart ұранымен өтеді.

Instagram-дағы бұл жарияланымды көру

KAZAKHSTAN PARALYMPIC TEAM 🇰🇿 (@kazparalympics) жариялаған пост

Қазақстан намысын қанша спортшы қорғайды?

Азия Пара ойындарында Қазақстан атынан 152 спортшы сынға түседі. Олар спорттың 12 түрінен бақ сынайды: пара жеңіл атлетика, пара жүзу, парадзюдо, паратаеквондо, парапауэрлифтинг, пара үстел теннисі, пара садақ ату, пара нысана көздеу, паравелоспорт, отырып ойнайтын волейбол, бочча және арбадағы теннис.