Қазақстан құрамасы жаңа бапкердің дебюті алдында екі көшбасшысынан айырылды

Екі футболшы да 26 қыркүйекте өтетін Ұлттар лигасының Фарер аралдарына қарсы алғашқы ойынына дайындық тізіміне енген болатын. Алайда дайындық барысында екеуінің де жарақат алғаны белгілі болды.

"Әлібек Қасым жарақатына байланысты Фарер аралдары мен Словакияға қарсы өтетін матчтерде ұлттық құрамаға көмектесе алмайды. Ал өз алаңымызда өтетін Молдова мен Фарер аралдарына қарсы ойындарға қатысу мүмкіндігі оның сауығу барысына қарай кейінірек анықталады. Ислам Чесноков жарақатына байланысты алдағы төрт матчке қатыса алмайды", - делінген мәлімдемеде.

Айта кетейік, жарақатына байланысты Дастан Сәтпаев та ұлттық құраманың оқу-жаттығу жиынынан тыс қалды, ал Бахтиёр Зайнутдинов бабына келіп жатыр және бірнеше айдан бері мәскеулік "Динамоның" негізгі құрамына ілікпей жүр.

Фарер аралдарымен өтетін матч - жаңа бапкердің Қазақстан құрамасындағы дебюті

Еске салайық, 26 қыркүйектегі кездесу команданың Ұлттар лигасындағы жаңа циклінің басталуы ғана емес, сонымен қатар нидерландылық маман Джон ван ’т Шкиптің біздің құрамадағы алғашқы қадамы болмақ.

62 жастағы маман Талғат Байсуфинов бас бапкер қызметінен күтпеген жерден кеткен соң, 7 тамызда команда тізгінін ұстады.

Бұған дейін ол бапкер ретінде "Аякс" клубында жұмыс істеп, Грекия және Армения құрамаларын басқарған.

Қазақстан құрамасы Ұлттар лигасында қатарынан төрт матч өткізеді

Айта кетейік, осы маусымнан бастап УЕФА құрамалар матчтері үшін халықаралық үзілістерді ұзартты. Енді алғашқы терезеде-ақ командалар бірден төрт кездесу өткізуі тиіс.

Қазақстан құрамасы ойындарды түзде бастайды: 26 қыркүйекте Фарер аралдары және 29-ында Словакиямен кездеседі. Одан кейін команда өз алаңында тағы екі ойын өткізеді: 2 қазанда Молдованы, ал 6 қазанда Фарер аралдарын қабылдайды.