Қазақстан құрамасының бұрынғы футболшысы енді трактор айдайды: мән-жайы

Фото: Қазақстан футбол федерациясы//instagram.com/ostap.9.sergey/

Әлеуметтік желілерде Қазақстан құрамасы мен елордалық "Астананың" бұрынғы шабуылшысы Сергей Остапенко тракторшы болды деген ақпарат тарады. Tengri Sport ойыншының өзіне хабарласып, мән-жайды анықтады.

40 жастағы ойыншы мансабын 2015 жылы аяқтап, кейін футбол саласында қалмауды ұйғарған. Сергейдің айтуынша, ол әлі ойыншы болып жүрген кездің өзінде арнайы техниканы жалға берумен айналысатын компанияның негізін қалаған.

"Мен техниканы жалға беретін компанияның директорымын. Бұл компания мен әлі футбол ойнап жүрген уақыттан бері жұмыс істеп келеді", - деді ол тілшімізбен әңгіме барысында.

Сонымен қатар оны шынымен де трактордың немесе басқа техниканың рулінде көруге болады.

"Менің тракторшы-машинист куәлігім бар екені рас. Иә, мен өзімде бар кез келген арнайы техникада өзім де жұмыс істей беремін", - деп атап өтті Остапенко.

Айта кетейік, Сергейдің әлеуметтік желілердегі парақшасы қазір арнайы техниканың видеолары мен фотоларына толы.

Instagram-дағы бұл жарияланымды көру

Сергей Остапенконың (Sergey Ostapenko, @ostap.9.sergey) жарияланымы

Сергей Остапенконың мансабы: Англияға соғылған гол және бельгиялық клубқа сапар

Сергей Остапенко мансабын 2003 жылы алматылық "Цеснада" (кейіннен "Алма-Ата") бастап, команда сапында 117 матч өткізді. Содан кейін "Тобылмен" бірге Қазақстан футболы үшін жалғыз еуропалық трофей - Интертото кубогын жеңіп алды.

Осыдан кейін 2008 жылы еуропалық мансабын бастауға әрекет жасап, Бельгияның екінші лигасындағы "Антверпенге" аттанды. Алайда ол жақта бірде-бір матч өткізген жоқ - алдымен құжаттарға қатысты мәселелер болды, кейін жаттықтырушылар құрамының сенімінен шыға алмады.

Елге оралғаннан кейін оның мансабында тағы бір жарқын сәт болды.

2009 жылы ӘЧ-2010 іріктеу кезеңі аясында Қазақстан Алматыда Англия құрамасын қабылдады. 17-минутта Остапенко айып добын орындау кезінде қарсылас қорғаушыларын алдап өтіп, есеп 0:0 болып тұрғанда гол соқты. Доп команда үшін тарихи болуы мүмкін еді, бірақ төреші офсайд тіркеп, голды санамады.

Дәл осы матчте бірнеше минуттан кейін Остапенко жарақат алып, бірнеше айға қатардан шығып қалды және оны ауыстыруға тура келді. Команда 0:4 есебімен жеңілді.

Кейін ол "Локомотив" (Астана), "Жетісу" және "Қайсар" клубтарында ойнап, 2015 жылы мансабын аяқтауға шешім қабылдады.