"Номадтың" 21 жастағы шеткі шабуылшысы Қазақстанның ересектер құрамасы сапында алғаш рет Азия чемпионатына қатысады. Оның айтуынша, ол ұлттық командада мүлдем басқа деңгейді сезініп отыр.
"Бірінші кезекте, маған осындай сенім білдірілгеніне, жаттықтырушының мені осы құрамнан көргеніне өте қуаныштымын. Әр матчте ел намысын қорғап, өзімді дәлелдеуге тырысамын. Бұл мүлдем бөлек деңгей – ересектер құрамасының деңгейі. Мұнда ойыншылар басқаша, кәсібилігі жоғары. Бізді жақсы турнир күтіп тұр. Оған бәріміз бірге дайындалып жатырмыз, мен өз ойыныммен бәрін дәлелдеуге күш саламын", - деді Артур тілшімізге берген сұхбатында.
Канада мен Қазақстан арасындағы айырмашылық және бейімделу
Артур 2025-2026 жылғы маусымды Британ Колумбиясының хоккей лигасында (BCHL) Victoria Grizzlies командасы сапында өткізді.
Бұл – Ұлттық хоккей лигасының (NHL) көптеген жұлдызы өткен студенттік лига. Мәселен, Стэнли Кубогінің үш дүркін иегері Дункан Кит немесе 2022 жылғы чемпион Алекс Ньюхук осы лигада ойнаған. Соңғысы, айтпақшы, қазақстандық хоккейшімен бір клубта, бірақ 2019 жылы өнер көрсеткен.
– Өткен маусымды мұхиттың арғы жағында өткіздіңіз. Неге елге оралу туралы шешім қабылдағаныңызды және Қазақстан чемпионаты мен өзіңіз ойнаған лиганың жағдайы мен хоккейінде қандай айырмашылық бар екенін айтып бере аласыз ба?
– Бұл екі лиганы салыстыру қиын. Ол жақта хоккей жастардікі, ашық, бәлкім, батыл әрі күш қолдануға негізделген дер едім. Бірақ бұл жастыққа тән қасиет шығар деп ойлаймын. Ал біздің чемпионатта шебер пас шығара алатын тәжірибелі ойыншылар көп.
Кетуге не себеп болды? Мен бұған дейін осында, соның ішінде "Барыста" ойнадым. Канада университеттері мен Американың жоғары оқу орындарынан ұсыныстар болды, мен соған ұмтылған едім, бірақ нақты өзім барғым келген жерлерден ұсыныс түспеді. Нәтижесінде "Барыс" жүйесінде мансабымды жалғастыруды ұсынды, мен мұны қуана қабылдадым.
– Құпия болмаса, сіз қай командаларға барғыңыз келді? Қай клубтардың құрамына өте алмадыңыз? Алдағы уақытта қайта оралуыңыз мүмкін бе?
– Мұндағы кәсіби маусымнан кейін Американың университет лигасына бару мүмкін емес. Аляска, Мичиган университеттерімен сөйлескен болатынмын.
– Неге дәл солармен жұмыс істегіңіз келді? Оған командалардың деңгейі әсер етті ме, әлде сол қалаларда болғыңыз келді ме? Мүмкін білім сапасы маңызды болған шығар?
– Жоқ, ол жерде лига деңгейі жақсы. Көптеген жұлдыз сонда ойнаған. Оған қоса маған деген көзқарастары, мені қалай қарастырғандары ұнады. Бірі көбірек бақылады, жиі хабарласты, қысқасы, олар тарапынан қызығушылық жоғары болды.
– Өзіңіз тікелей ойнаған командаға келетін болсақ, өткен маусымды қалай бағалайсыз?
– Ұйымдастыру деңгейі өте жоғары. Командалар өте көп болса да, жастар деңгейіндегі мұндай кәсіби көзқарасқа таңғалдым. Мені өте жақсы қарсы алды, жаттықтырушылар құрамы тамаша болды. Бастапқыда ағылшын тілін жақсы білмегеніме қарамастан, бәрі маған жылы қабақ танытып, көмектесті.
– Қазақстаннан келгеніңізге байланысты командада сізге ерекше лақап ат қойылды ма?
– Осындағыдай Арчи немесе Гроссер деген лақап аттар болды. Бұл енді сленг қой. Алғашқы уақытта қасымда маған аударып беретін немесе қарапайым тілмен түсіндіретін бір жігіт болды, өйткені жыл бойы командада орыс тілді ешкім болған жоқ. Бірақ Жаңа жылға қарай еркін сөйлеп кеттім.
– Алдағы уақытта мұхиттың арғы жағынп жаңа мәртебеде оралуды армандайсыз ба, әлде қазір "Барыс" пен ҚХЛ-дағы мансабыңызға көбірек көңіл бөлгенді жөн көресіз бе?
– Маусымның қалай өтетіні және маған қандай маман ретінде қарайтындары көп нәрсені шешеді деп ойлаймын. Өзімді көрсетуге тырысамын. Ал жалпы мұхиттың арғы беті де маған ұнады.
Қазақстан құрамасында Ресейдің әлемдік хоккейге оралуын бағалады
– Жақында ресейліктерді ересектер арасындағы әлем чемпионатына қайтаруы мүмкін деген жаңалық шықты. Бұл жаңалыққа қалай қарайсыз?
– Меніңше, бұл бәсекелестікті арттыратыны сөзсіз. Бұл барлық командалар үшін, тіпті төменгі дивизионда ойнайтындар үшін де тиімді. Топ мықтырақ, ал чемпионат қызықтырақ болады. Элиталық дивизионда жұлдыздар көбейеді, өйткені Ресей құрамасы барлық деңгейде жақсы ойнайды.
– Азия чемпионатында алдыңызға қандай міндеттер қойдыңыз? Мүмкін соғылған шайбалар саны бойынша нақты мақсат бар шығар немесе құраманың қазіргі мақсаты қандай?
– Құрама сапында жеке жетістіктерді алға қоймаймын, бастысы – команданың нәтижесі. Құраманың мақсаты – тек бірінші орын алу және Азияда біздің мықты екенімізді дәлелдеу.
Қазақстан құрамасы Азия чемпионатында
Еске сала кетейік, хоккейден Қазақстан құрамасы 2024 және 2025 жылдары Азия чемпионатының алғашқы екі маусымында жеңіске жеткен болатын. Биыл команда 2026 жылдың 5-8 қарашасы аралығында Оңтүстік Кореяда өтетін турнирде өз титулын қорғайды.
5 қараша күні-ақ біздің команда басты қарсыласы - Жапониямен ойнайды, ал 7 және 8 қарашада Қытай және Оңтүстік Корея құрамаларымен кездесу өткізеді.
Қазақстан құрамасының аңыз ойыншысы Роман Старченко жаңа қызметке тағайындалды