Қазақстан Сербияға қарсы: Конференция лигасындағы “Тобыл“ матчін қайдан көруге болады?

Фото: instagram.com/partizanbelgrade//instagram.com/fctobol/

7 тамызға қараған түні қостанайлық "Тобыл" Конференция лигасының үшінші іріктеу кезеңі аясында сербиялық "Партизанға" қарсы матч өткізеді. Белградта (Сербия) өтетін бұл ойын қазақстандық ұжым үшін үлкен сын болмақ, - деп хабарлайды Tengri Sport.

Екінші кезеңде "Тобыл" құрамы жағынан қарсыласынан басым көрінгенімен, Литваның "Паневежисін" пенальти сериясында әрең жеңген болатын. Енді қостанайлықтар бұл ойынға аутсайдер ретінде шыққалы тұр.

"Партизанның" бір ойыншысы "Тобылдың" бүкіл құрамынан қымбат

Беделді Transfermarkt порталы сербиялық клубтың құнын 44,1 миллион еуроға бағаласа, олардың ең қымбат футболшысы Огнен Угрешичтің бағасы 10 миллион еуро болады.

Қазақстандық команда сапындағы ең қымбат ойыншы – ұлттық құрама мүшесі Ислам Чесноков (1,2 миллион еуро), бірақ оны қосқанның өзінде құрамның жалпы құны небәрі 9,78 миллион еуроға ғана жетеді.

Еуропадағы тәжірибе де сербтердің пайдасына шешіліп тұр

Белградтық "Партизан" еурокубоктердегі дебютін 1996 жылы жасаған және содан бері негізгі кезеңдерде тұрақты өнер көрсетіп, плей-офф сатыларына шығып келеді.

Сербтердің соңғы ірі табысы – 2022/2023 маусымында Конференция лигасының 1/16 финалына дейін жетуі. Дегенмен, кейінгі үш жылда "Партизан" іріктеу кезеңінен аса алмады.

Сонымен қатар, "Партизанның" Қазақстанда ойнау тәжірибесі де жаман емес – 2019 жылы олар Еуропа лигасының топтық кезеңінде "Астанамен" кездесіп, екі рет те жеңіске жеткен (Белградта 4:1 және Астанада 1:2).

"Тобылдың" мүмкіндігі – физикалық дайындығының жоғарылығында

Қазақстандық клуб ел чемпионатында 20 ойын, еурокубоктерде екі матч өткізіп үлгерсе, сербтер үшін маусым енді ғана басталды.

"Партизан" ішкі біріншілікте үш кездесу өткізіп, Конференция лигасында Люксембургтің "УНА Штрассен" клубын қапы қалдырды. Дегенмен, соңғы екі матчте белградтықтар екі рет жеңіліске ұшырады.

"Тобыл" Сербияға ел чемпионатының көшбасшысы – шымкенттік "Ордабасыдан" 0:2 есебімен ұтылғаннан кейін аттанды.

"Партизан" - "Тобыл": тікелей көрсетілім

Қостанайлық "Тобыл" мен белградтық "Партизан" арасындағы матч 7 тамызда Қазақстан уақытымен сағат 00:00-де басталады.

Кездесуді Qazsport телеарнасы тікелей эфирде көрсетеді, сондай-ақ телеарна сайты тікелей эфирде көрсетеді.