Қазақстандық әлем чемпионы бокстан Азия ойындарына бармайды: себебі белгілі

Ташкентте (2023 жыл, 48 келіге дейін) және Ливерпульде (2025 жыл, 50 келіге дейін) өткен додаларда топ жарған 23 жастағы қазақстандық боксшы биылғы маусымның басты жарысынан тыс қалады. Бұл жарыстың тек алты салмақ дәрежесі бойынша өтетіндігімен байланысты, ал оның ішіндегі ең жеңілі – 55 келіге дейінгі салмақ.

"50 келіге дейінгі салмақ дәрежесін Олимпиада бағдарламасына қоспау туралы шешімді Халықаралық Олимпиада комитеті World Boxing ұйымымен бірлесіп қабылдады. Бұл ретте Азия құрлығында дәстүрлі түрде жеңіл салмақтағы мықты боксшылардың өте көп екенін ескеру қажет.

Сондықтан бұл салмақты бағдарламаға қосу мәселесі көптеген ұлттық федерация үшін өзекті болып қала береді. Аталған салмақ дәрежесі келесі Олимпиада циклінде бағдарламаға қайтарылуы әбден мүмкін. Алайда қазіргі уақытта бұл туралы нақты айту ерте, өйткені бұл мәселе бойынша әлі ресми шешім шыққан жоқ", - деп мәлімдеді Қазақстан бокс федерациясы Tengri Sport-қа.

Осылайша, Тәшкенбай бұл циклде Азия чемпионатында, әлем чемпионатында және Әлем кубогінде бақ сынайды, бірақ кешенді жарыстардан тыс қалады. 2027 жылы Астанада өтетін әлем чемпионатында ол ел тарихындағы тұңғыш үш дүркін әлем чемпионы атануы мүмкін.

Айта кетейік, Азия ойындарына қатысатын Қазақстан ерлер құрамасының түпкілікті құрамы әлі жарияланған жоқ. Дегенмен, бұдан жоғары салмақ дәрежесінде команда сапында тағы бір әлем чемпионы Махмұд Сабырхан бар, сондықтан Тәшкенбайдың сол салмаққа ауысу мәселесі әзірге қарастырылып жатқан жоқ.

Естеріңізге сала кетейік, Азия ойындары 2026 жылдың 19 қыркүйегі мен 4 қазаны аралығында Жапонияның Аичи префектурасы мен Нагоя қаласында өтеді.

Бұған дейін бокстан Қазақстан әйелдер құрамасының Азия ойындарына баратын құрамы белгілі болды. Оған бірден төрт әлем чемпионы енді, бірақ Азия чемпионы Дина Исламбекова тізімге ілікпеді – оның да салмақ дәрежесі турнирде ұсынылмаған.