Қазақстандық бапкер Үндістанда қылмыстық қудалауға ұшырады: СІМ реакциясы

БАҚ мәліметінше, 34 жастағы бапкер кәмелетке толмаған қызбен байланыста болды деп айыпталып отыр. Мақалада жәбірленуші оқу-жаттығу жиынында болғаны және Аязбаевты зорлады деп айыптағаны айтылады.

БАҚ-тағы жарияланымдарға Қазақстан велоспорт федерациясы пікір білдірді. Олар 34 жастағы қазақстандыққа қатысты қылмыстық іс қозғалғанын, ал Үндістан велоспорт федерациясы Аязбаевтың келісімшартын тоқтатқанын растады.

"Жарияланымдарда көрсетілген оқиғалар ол үндістандық тараппен жұмыс істеп жүрген кезеңде Үндістан аумағында бодлған және оны Үндістанның құқық қорғау органдары қарап жатыр. Қазір Үндістанның құқық қорғау органдары ресми тергеу жүргізіп жатыр.

Қолда бар ақпарат бойынша, қылмыстық іс қозғалған, ал Үндістан велоспорт федерациясы тергеу амалдары аяқталғанша маманның қызметін тоқтатты. Ресми тергеу аяқталып, Үндістанның құзыретті органдары істің барлық мән-жайын анықтағанға дейін асығыс қорытынды жасамай, баға бермегенді жөн деп санаймыз", - делінген хабарламада.

Сонымен қатар федерация бапкердің Қазақстан ұлттық құрамасына қатысы жоқ екенін атап өтті.

"Мақсат Аязбаев кейінгі жылдары үндістандық тараппен келісімшарт негізінде Қазақстаннан тыс жерлерде кәсіби жұмыс істеп, Үндістанның велоспорттан ұлттық құрамасын дайындаумен айналысқан. Оның кәсіби қызметі үнді құрамасымен байланысты болды. Үндістандық БАҚ та оның үнді командасы құрамындағы жұмысы мен спортшыларды халықаралық жарыстарға дайындағаны туралы хабарлап жатыр. Мақсат Аязбаевтың қазір Қазақстан ұлттық құрамасына ешқандай қатысы жоқ", - делінген мәлімдемеде.

Ал Қазақстан Сыртқы істер министрлігі Аязбаевтың мәселесі ведомствоның бақылауында екенін хабарлады.

"Министрлік Үндістандағы ҚР азаматына қатысты жағдайдан хабардар. Қазақстандық дипломаттар бұл азаматтың туыстарымен байланыста. Оған консулдық-құқықтық көмек көрсетіліп жатыр. Министрлік бұл мәселені бақылауда ұстап отыр", - деп атап өтті ҚР СІМ.

Айта кетейік, Мақсат Аязбаев – кәсіби велошабандоз. Бұған дейін "Astana" велокомандасы сапында өнер көрсеткен.

Ол 2025 жылдан бастап Үндістанның велоспорттан ұлттық құрамасының бас бапкері болып жұмыс істеді және команданы Жапониядағы Азия ойындарына бастап баруы тиіс еді.