Қазақстандық боксшы қарсыласын жеңіп, Азия чемпионатының финалына шықты

50 келіге дейінгі салмақ дәрежесіндегі қазақстандық боксшы Нұрасыл Ғалым 15 және 17 жасқа дейінгі спортшылар арасындағы Азия чемпионатының финалына шықты, - деп хабарлайды Tengri Sport.

Жартылай финалда қазақстандық спортшы Оңтүстік Кореядан келген боксшы Сонгмин Квонмен кездесті.

Үш раунд бойы Ғалым қарсыласынан басым түсіп, жекпе-жек тізгінін бермеді. Қорытындысында жекпе-жек төрешілер шешіміне дейін жалғасып, олар жеңісті бір ауыздан қазақстандыққа берді — 5:0.

Осылайша, Нұрасыл Ғалым Азия чемпионатының финалына жолдама алып, турнирдің алтын медалі үшін бақ сынайды.

Еске салайық, бүгін Қазақстан құрамасының қатысуымен тағы 7 жартылай финалдық жекпе-жек өтеді.

Бүгін 15 және 17 жасқа дейінгі спортшылар арасындағы Азия чемпионатының финалына шығу үшін мына спортшылар таласады: Бекхан Оразбай (52 келіге дейін), Нұрислам Оңалбек (57 келіге дейін), Эмир Мұхит (60 келіге дейін), Мейіржан Жүніс (63 келіге дейін), Ислам Сүлейманоғлы (66 келіге дейін), Әлібек Алпамыс (80 келіге дейін) және Сабыржан Сағым (80 келіден жоғары).