Қазақша
Русский
Қазақстандық дзюдошы Шерзод Давлатов әлем чемпионатында күміс жүлде иеленгеннен кейін 60 келіге дейінгі салмақ дәрежесінде әлемдік рейтингтің үздік ондығына енді, деп хабарлайды Tengri Sport Халықаралық дзюдо федерациясының баспасөз қызметіне сілтеме жасап.
24 жастағы қазақстандық әлем чемпионатының медалі арқасында рейтингте 15 сатыға жоғарылады.
Бакуде өткен турнирдің жартылай финалында ол Олимпиаданың қола жүлдегері әрі Жапониядан келген әлем чемпионы Рюдзю Нагаяманы жеңіп, шешуші белдесуде Әзірбайжан спортшысы Ахмад Юсифовқа есе жіберді.
Айта кетейік, Қазақстан құрамасының осы салмақтағы тағы бір көшбасшысы, Олимпиада чемпионы Елдос Сметов небәрі 115-орында тұр.
Әлемнің үздік дзюдошыларының бірі Олимпиададағы жеңісінен кейін бір жарым жылға жуық уақыт үзіліс алып, Азия ойындарына баса назар аудару мақсатында әлем чемпионатына бармаған болатын.
Шерзод Давлатов деген кім?
Шерзод 2001 жылы 17 қарашада дүниеге келген және Алматыда өскен. Бес жасынан бастап дзюдомен айналысады, ал 2017 жылы кадеттер арасындағы Азия чемпионатын жеңіп, алғашқы ірі халықаралық табысына қол жеткізген.
2021 жылы Давлатов жастар арасындағы әлем чемпионатының қола жүлдегері атанса, енді марапаттарының қатарын ересектер арасындағы әлем чемпионатының күмісімен толықтырды.
Сондай-ақ оның қоржынында Гран-при кезеңдеріндегі бірнеше жеңіс бар.
Бұған дейін бокстан Қазақстан атынан шыққан әлем чемпионы Төрехан Сабырханның биі әлеуметтік желілерде кеңінен тараған еді.
20 миллион теңгеден: Спорт министрлігі шахматшылардың сыйақысына қатысты жағдайды түсіндірді
+7 (777) 001 44 99
