Қазақстандық хоккейшілердің бапкері қызметінен шеттетілгеннен кейін клубтан кетті

6 қазанда "Металлург" команда жетекшілерімен арадағы жанжалға байланысты Разинді қызметінен шеттеткен болатын.

Араға 12 күн салып, Андрей Разин екі тараптың өзара келісімімен клубтан біржола кетті.

"Металлург" хоккей клубы мен Андрей Владимирович Разин бірлескен жұмысты тоқтату туралы келісімге келді. Андрей Владимирович екі тараптың келісімі бойынша командамыздың бас бапкері қызметінен кетеді", – деп мәлімдеді клуб директоры Алексей Жлоба.

Разиннің хоккейшімен жанжалы жұртқа жария болды

Құрлықтық хоккей лигасындағы (ҚХЛ) беделді бапкерлердің бірі саналатын Андрей Разин баспасөз мәслихаттарындағы өткір мәлімдемелерімен жиі көзге түседі. Мұндай әрекеттері үшін оған бірнеше рет айыппұл да салынған.

Осы маусымда Разин командадағы жетекші ойыншылардың бірі Владимир Ткачевпен арадағы келіспеушілігін бұқаралық ақпарат құралдары арқылы ашық жанжалға ұластырды. Оқиға 18 қыркүйекте болған. "Барыспен" өткен матчтан кейінгі баспасөз мәслихатында Разин ашуға беріліп, журналистер алдында дөрекі сөздер айтқан.

Назар аударыңыз! Видеода бейәдеп сөздер кездеседі.

52 жастағы маман Магнитогорск клубын 2023 жылғы сәуірден бері басқарып келді. Разинмен бірге "Металлург" 2024 жылғы Гагарин кубогының иегері атанды.

Бас бапкер шеттетілгеннен кейін команда 4 ойынның төртеуінде де жеңіске жетіп, жалпы 16:5 есебімен басым түсті. Қазір 17 матчте 27 ұпай жинап, ҚХЛ-ның Шығыс конференциясында көш бастап тұр.

Конференцияда екінші орынға "Барыс" жайғасты. Михаил Кравецтің шәкірттері 16 кездесуде 20 ұпай еншіледі.