Қазақстандық клуб “Ювентус“ және “Ньюкаслмен“ бірге УЕФА тізіміне енді

Қазақстандық "Астана" Еуропа футбол қауымдастықтары одағының (УЕФА) қаржылық ережелерін бұзып, миллиондаған айыппұл арқалаған клубтар тізіміне ілікті, - деп хабарлайды Tengri Sport тілшісі ұйымның баспасөз қызметіне сілтеме жасап.

УЕФА мәліметінше, бірнеше клуб футболшылардың табысына қатысты ережелерді бұзған.

Ұйым тарапынан санкция салынғандар қатарында "Ювентус" (Италия), "Ньюкасл" (Англия), "Ницца" (Франция), "Санта-Клара" (Португалия), "Астана" (Қазақстан) және "Партизан" (Сербия) бар.

Бұл ретте УЕФА "Астана" мен "Партизанның" заңбұзушылықтарын айтарлықтай маңызды емес деп танып, оларға 100 және 200 мың еуро (55 және 110 миллион теңге) көлемінде айыппұл салды.

Тізімдегі өзге клубтарға УЕФА бұдан да қомақты айыппұлдар кескен: "Ювентуске" 20 миллион еуро (14-і шартты түрде), ал "Ньюкаслға" 10 миллион еуро (7-і шартты түрде) айыппұл салынды.

"Астананың" қаржылық мәселелері олардың еурокубоктарға қатысуына әсер етуі мүмкін еді

Бұған дейін БАҚ пен әлеуметтік желілерде "Астана" футбол клубы қаржыландырудың жоқтығынан Конференция лигасының іріктеу кезеңіне қатысудан бас тартуы мүмкін деген ақпарат тараған болатын.

Алайда клуб ресми мәлімдеме жасап, бұл ақпаратты жоққа шығарды. Мәлімдемеде халықаралық турнирлерге қатысуға қатысты мәселелер УЕФА мониторингімен байланысты екені айтылған.

"Клубтың еурокубоктарға қатысуына төнген қауіп команданың Албанияға баруына қаражаттың жоқтығымен байланысты деген ақпарат шындыққа жанаспайды. Ойынға дайындық штаттық режимде жүріп жатыр, ал ұшу, тұру және команданың қатысуын ұйымдастыруға байланысты барлық шығын толық көлемде қамтамасыз етілген.

Себеп тек УЕФА-ның тоқсан сайынғы қаржылық мониторинг процедурасынан өтуіне байланысты, оның аясында клуб команда мүшелері алдындағы қаржылық міндеттемелері бойынша мерзімі өткен берешектің жоқтығын растайды. Қазіргі уақытта клуб аталған процедурадан сәтті өту үшін қажетті жұмыстарды жүргізіп жатыр", - делінген клуб хабарламасында.

УЕФА релизіне қарағанда, мониторинг аяқталып, қазақстандық клубқа салынатын санкция тек айыппұлмен шектелетін болды.

Бұл ретте команданың бас бапкері Григорий Бабаян жақында ұжымның қаржылық жағдайы туралы сұраққа былай деп жауап берген еді:

"Әзірге күнімізді көріп жүрміз. Қолдан келгенше тырысып жатырмыз, иә. Қолымыздан келгеннің бәрін жасап жатырмыз. Әзірге бұдан артық ештеңе айта алмаймын, бірақ әзірге жағдай өзгерген жоқ".

Айта кетейік, былтырдан бастап қазақстандық футбол клубтары легионерлердің қызметіне мемлекеттік бюджеттен ақы төлей алмайды, ал клубтардың өздері Президент Тоқаевтың тапсырмасымен жеке меншікке берілуі тиіс.

2025 жылдың аяғында Қазақстанның туризм және спорт министрі Ербол Мырзабосынов "Астана" үшін инвесторлар табылды деп мәлімдеген болатын, бірақ қазіргі уақытқа дейін клуб жеке меншікке өткен жоқ.

Еске салайық, "Астана" - Қазақстандағы ең көп марапатқа ие футбол клубы. Клубтың жеті чемпиондық титулы, үш ел кубогы бар, сондай-ақ Чемпиондар лигасы, Еуропа лигасы және Конференция лигасының топтық кезеңдеріне қатысқан.

Айта кетейік, 10 шілдеде "Астана" Конференция лигасының іріктеу кезеңіндегі алғашқы матчін өткізеді - команда қонақта албаниялық "Динамо Ситимен" ойнайды.