Қазақстандық маман әлемнің бұрынғы бірінші ракеткасының жаттықтырушысы болды

2024 жылы мансабын аяқтаған бұрынғы қазақстандық теннисші Медведевтің Цинциннатидегі алдағы Мастерс және US Open турнирлеріне арналған командасына қосылды.

"Біз байқап көреміз, яғни оны жаңа бапкер деп айтуға болады, бірақ қазір жоспарымызда Цинциннати мен US Open бар. Оның немен аяқталатынын көреміз. Әрине, бұл мен үшін жаңа шытырман оқиға.

Әзірге онымен жұмыс істеу маған қатты ұнайды. Ол керемет адам, бұл да әрқашан маңызды. Бірақ, әрине, біртіндеп корттағы жұмыс барысында бір-бірімізді тани түсеміз. Мұның бәрі көптеген жағдайларға байланысты болады", - деді Медведев.

Қазіргі уақытта Медведев әлемдік рейтингте 7-орында тұр. 11 шілдеде теннисші бапкер Томас Юханссонмен бірлескен жұмысын тоқтатқан болатын.

Андрей Голубев - Қазақстанның ең атақты теннисшілерінің бірі

Еске сала кетейік, Голубев - Гамбургтегі ATP турнирінің жеңімпазы, жұптық сында бірнеше ATP титулының иегері, Australian Open және Roland Garros финалисі, сондай-ақ Дэвис кубогында Қазақстан құрамасының көпжылдық көшбасшысы.

Сонымен қатар, Андрей 2014 жылғы Азиадада ел қоржынына алтын салып, Токиодағы (Жапония) 2020 жылғы Олимпиадаға қатысты.

Голубевтің ATP жекелей рейтингіндегі ең жоғары көрсеткіші - 33-орын. Ол өз мансабын 37 жасында туған жанкүйерлерінің алдында аяқтады.

Біздің сауалымызға Қазақстан теннис федерациясы шетелде жұмыс істей бастағанына қарамастан, Голубевтің азаматтығын ауыстырмағанын және қазақстандық болып қала беретінін растады.

Маусым айының ортасында ол Қарағандыда жас теннисшілерге арналған шеберлік сағатын өткізген болатын.

Бұған дейін қазақстандық Елена Рыбакина Торонтодағы турнирдің финалында польшалық Ига Швёнтекке жол берген еді.

Жеңіліске қарамастан, ол Канададан 500 мың доллардан астам қаражат алып қайтады.