Қазақстандық Олимпиада чемпионы қызметінен кете ме? Жауап белгілі болды

Фото © Tengrinews.kz / Тұрар Қазанғапов

Бұқаралық ақпарат құралдары мен әлеуметтік желілерде велоспорттан Қазақстанның жалғыз Олимпиада чемпионы Александр Винокуров 2013 жылдан бері атқарып келген XDS Astana велокомандасының бас менеджері лауазымынан кететіні туралы ақпарат тарады. Осыған байланысты Tengri Sport "Туризм және спортты қолдау қорына" сауал жолдады.

Инсайдерлердің мәліметінше, Александр Винокуровқа бас менеджер қызметінен кетіп, таза спорттық блокпен айналысу ұсынылған.

БАҚ мәліметіне сәйкес, команданың бас менеджері Яна Зель болуы мүмкін. Ол бұған дейін 2019-2021 жылдар аралығында қазақстандық велокомандада басқарушы директор болып жұмыс істеген.

Кейін ол белгиялық Lotto Soudal командасында коммерциялық директор қызметін атқарды, ал 2024 жылдың ақпанынан бастап алдымен бизнес-стратегия және медиа жөніндегі директор, содан соң БАӘ-нің UAE Team ADQ әйелдер командасының бас менеджері болды.

Instagram-дағы бұл жарияланымды көру

Yana Seel-дің (@yanaseel) жарияланымы

Винокуров қала ма?

Біздің сауалымызға берген жауабында "Туризм және спортты қолдау қоры" БАҚ-тағы ақпаратты теріске шығарды.

"Бірқатар бұқаралық ақпарат құралы мен ақпараттық ресурстарда XDS Astana Team велокомандасының басшылығы ауысатыны туралы тараған мәліметтерге байланысты "Туризм индустриясы мен спортты қолдау қоры" корпоративтік қоры бұл ақпараттың шындыққа жанаспайтынын хабарлайды. Александр Винокуров XDS Astana Team бас менеджері лауазымын атқаруды жалғастырады. Яна Зель команданың басқарушы директоры қызметіне тағайындалды.

"Туризм индустриясы мен спортты қолдау қоры" корпоративтік қоры өз қызметін және команданы қолдау бойынша қабылданған міндеттемелерін орындауды жалғастырады. Команданың тұрақты жұмысын қамтамасыз ету және оны одан әрі дамыту бойынша жұмыстар белгіленген тәртіппен жүргізіліп жатыр.

Бұқаралық ақпарат құралдары мен ақпараттық ресурстар өкілдерінен ресми ақпаратқа сүйенуді және жарияланымдар дайындау кезінде сенімді мәліметтерді пайдалануды сұраймыз", - деп мәлімдеді қор өкілдері сауалға берген жауабында.

Винокуровтың өзі бұл ақпаратқа қатысты әзірге пікір білдірген жоқ.

Еске сала кетейік, "Астана" велокомандасы 2007 жылы тасжолдағы веложарыстардан әлемдік жетекші турнирлерге қатысу үшін құрылған. Бұған дейін оның сапында Александр Винокуровтың өзі, сондай-ақ әлемнің үш дүркін чемпионы, Олимпиаданың күміс жүлдегері, ұлыбританиялық Марк Кавендиш өнер көрсеткен.

2024 жылдың шілдесінде велоспорттың 39 жастағы жұлдызы ең беделді "Тур де Франс" жарысының 5-кезеңінің жеңімпазы атанды. 2025 жылғы маусымда команда атауы Astana Qazaqstan Team-нен XDS Astana Team-ге өзгерді.

Велокоманданың қазір кімге тиесілі екені, оның бюджеті, мақсат-міндеттері туралы Александр Винокуров SauBall YouTube-арнасына берген сұхбатында айтып берген болатын.

Айта кетейік, "Астана" велокомандасына қытайлық инвесторлар келгеннен кейін, ол соңғы 10 жылдағы үздік маусымын өткізіп, элитаға қайта оралды.