Қазақстандық спортшы дзюдодан әлем чемпионы атанды

60 келіге дейінгі салмақ дәрежесінде сынға түскен қазақстандық Ғабит Расулхан ақтық белдесуде канадалық Роман Семирозумды жеңіп, кадеттер арасындағы әлем чемпионатының алтын медалін иеленді.

Сонымен қатар Қазақстан қоржынына Әділжан Нұрбекен (50 келі) мен Әдия Жанахмет (40 келі) күміс медаль салды. Ал Бекарыс Құдайберген (50 келі) мен Ахмет Баубек (60 келі) қола жүлдегер атанды.

Осылайша, алғашқы жарыс күнінің қорытындысы бойынша бір алтын, екі күміс және екі қола медаль жеңіп алған Қазақстан құрамасы жалпы медальдық есепте көш бастады.

Еске сала кетейік, Гуаякильде (Эквадор) өтіп жатқан кадеттер арасындағы әлем чемпионаты 23 тамызға дейін жалғасады. Жарысқа 59 елден 457 жас дзюдошы қатысып жатыр.