Қазақстандықтар Азия Пара ойындарындағы веложарыстарда үстемдік етті

Қазақстандық паравелошабандоздар В класы (көру қабілеті бұзылған спортшылар) бойынша ерлер арасындағы 65 шақырымдық және әйелдер арасындағы 55 шақырымдық жарыста алғашқы екі орынды иеленді.

Наиль Ермұханбет пен оның пилоты Руслан Алиев 2 сағат 1 минут 21 секунд нәтижесімен алтын медаль еншіледі. Ал Кирилл Илюкевич пен пилот Глеб Бруссенский 2 сағат 11 минут 42 секунд көрсеткішімен күміс жүлдегер атанды.

Әйелдер арасында Анастасия Калаус пен пилот Полина Братчикова 2 сағат 5 минут 47 секунд нәтижесімен алтын медаль иеленді. Жұлдыз Қайнарова мен пилот Анжелла Соловьева 2 сағат 9 минут 43 секунд уақытпен күміс жүлдеге ие болды.

Жалпы алғанда, Қазақстан паравелошабандоздары Азия ойындарында 4 алтын, 4 күміс және 1 қола жеңіп алды - бұл барлық команда арасындағы төртінші көрсеткіш.

Қазақстан құрамасы Азия Пара ойындарында: рекорд нәтижелер

Айта кетейік, биыл қазақстандық параспортшылар Азия ойындарында ұлттық құрама үшін рекорд орнатты. Жарыс аяқталуға бір күн қалғанда біздің команданың қоржынында 12 алтын, 15 күміс және 21 қола жүлде бар.

Бұған дейін жазғы Азия Пара ойындары тарихында Қазақстан құрамасы үшін ең үздік нәтиже 8 алтын медаль болған еді.