“Қазақтан қашып жүр“: америкалық БАҚ Әлімханұлының жекпе-жегіне қатысты пікір білдірді

16 қыркүйекте Дүниежүзілік бокс ұйымы (WBO) санкциялаған Шираз - Әлімханұлы арасындағы әлем чемпионы атағы үшін жекпе-жекке промоутерлік сауда өтуі тиіс.

Бұл күн жарияланғаннан кейін ұлыбританиялық боксшы сұхбат беріп, онда рингке шығуға дайын екенін растады, бірақ жекпе-жек өзіне қаржылық жағынан да тиімді болуы керектігін айтты.

"Енді мәселе жекпе-жекті өткізу құқығы үшін саудаға келіп тірелді, сондықтан не болатынын көрейік. Біз кәсіпқой боксшымыз. Біз тиісті сыйақы үшін жұдырықтасамыз. Менің ойымша, мансабымдағы ең маңызды жекпе-жек үшін ұсынылған сома тым аз болатын сәт тууы мүмкін. Меніңше, бұл онша қисынды емес, әсіресе менің де чемпион екенімді ескерсек", - деді ол Mr. Verzace подкастында.

Бұл ретте қазақстандық боксшының тарапы жекпе-жек тегін болса да одан бас тартпайтындарын мәлімдеді.

"Егер ол жұдырықтасқысы келсе, бірден келісер еді. Біздің тараптан ешқандай мәселе жоқ. Тегін болса да, 1 доллар болса да, Лондонда болса да, өзінің туған жері Пәкістанда болса да шығамыз. Әрі қарай не болады? Егер Хамза бас тартса, онда Жәнібек рейтингте төмен тұрған боксшымен титул үшін таласады", - деді Әлімханұлының менеджері Берік Сұлтан тілшімізге берген сұхбатында.

Америкалық БАҚ мұны "қазақтан қашып жүр" деп атады

Боксқа арналған беделді америкалық портал чемпиондар үшін коммерциялық мәселе басты орында болмауы керек деген пікір білдірді.

"Бокс - әрине, бизнес, бірақ чемпиондар өз мәртебесін дәлелдеу үшін қолжетімді ең мықты қарсыластармен жұдырықтасуы тиіс. Сауда басталмай жатып жекпе-жектің коммерциялық құндылығына шағымдану - қауіпті кездесуден жалтару үшін өз бағасын қолдан көтеру әрекеті екені анық", - деп жазады басылым.

Boxingnews24 басылымының пікірінше, егер Хамза Шираз белбеуден бас тартып, қазақстандықтан қашса, бокс жанкүйерлері одан теріс айналады.

"Егер ол өтпелі үміткерлермен жекпе-жектегі қауіпсіз сыйақы үшін белбеуді қоқысқа тастайтын болса, жанкүйерлер оның экономикалық тиімділік туралы сылтауына бір сәт те сенбейді. Олар мұны қалай көрінсе, солай атайды: қазақтан қашып жүр", - делінген мақалада.

Естеріңізге сала кетейік, ұлыбританиялық боксшы Жәнібек Әлімханұлына қарсы жекпе-жектен бұған дейін бір рет жалтарған болатын. Екі жыл бұрын екі боксшы да орта салмақта өнер көрсетіп жүргенде, олардың арасында қазақстандыққа тиесілі титул үшін жекпе-жек жоспарланған еді.

Сол кезде Шираз көпшілік алдында Жәнібектің белбеуіне үміткер ретінде шығуға келіскенімен, кейін оның командасы келіссөздерден шығып кеткен болатын.

Қазақстандықтың менеджері Берік Сұлтан Шираз қазір де осыған ұқсас әрекетке баруы мүмкін деген пікір білдірді.

Жәнібек Әлімханұлы - жаңа салмақтағы алғашқы титул жолында

Естеріңізге сала кетейік, жеңілмеген қазақстандық Жәнібек Әлімханұлы орта салмақта екі әлем чемпионы белбеуіне иелік еткен және былтыр желтоқсанда үшінші белбеу үшін жекпе-жекке дайындалып жатқан. Эрисланди Ларамен жекпе-жек қазақстандықтың қанынан мельдоний табылғаннан кейін тоқтатылды.

Допинг дауы салдарынан IBF Әлімханұлынан белбеуін тартып алды, ал WBO бір жылдық дисквалификация енгізді. Дегенмен, қазақстандық тараптың апелляциясынан кейін Жәнібекке рингке ертерек оралуға рұқсат берілді.

Әлімханұлының командасы 2026 жылдың жазында супер орта салмаққа өту үшін WBO белбеуінен бас тартатынын жариялады. Нәтижесінде ол бірден міндетті үміткер мәртебесін алды және келесі жекпе-жегінде қайтадан әлем чемпионы атануы мүмкін.

WBC Мейірім Нұрсұлтановтың титулдық жекпе-жегін ресми түрде жариялады