“Қазақтар қайда?“: UFC Ақ үйде турнир өтетінін жариялады

UFC аралас жекпе-жек ұйымы Ақ үй аумағында өтетін көптен күткен турнирдің ресми постерін таныстырды, деп хабарлайды Tengri Sport.

UFC баспасөз қызметі өзінің әлеуметтік желілерінде алдағы UFC Freedom 250 турнирінің ресми постерін жариялады.

Турнир 14 маусымда Вашингтондағы (АҚШ) Ақ үй аумағында өтеді.

Турнирдің басты оқиғасы - жеңіл салмақта UFC-дің уақытша чемпионы Джастин Гейджи мен титулдың толыққанды иегері Илия Топурия арасындағы жекпе-жек болмақ.

Ақ үйде өтетін UFC турнирінің толық карды

• Илия Топурия - Джастин Гейджи (жеңіл салмақтағы титул үшін айқас);
• Алекс Перейра - Сирил Ган (ауыр салмақтағы уақытша титул үшін айқас);
• Шон О'Мэлли - Айманн Захаби;
• Маурисио Руффи - Майкл Чендлер;
• Бо Никал - Кайл Дакас;
• Диего Лопес - Стив Гарсия.

Instagram-дағы бұл жарияланымды көру

UFC (@ufc) жарияланымы

Дегенмен, аралас жекпе-жек жанкүйерлері турнир кардына көңілі толмағанын байқатты. Спортсүйер қауымды аталған додада Қазақстан спортшыларының жоқтығы қынжылтты.

"Қазақтар қайда? Шавкат жоқ жерде қызық жоқ", - деп жазды UFC-дің ағылшын тілді жанкүйері пікірлер арасында.

Tengri Sport тілшісі UFC-дегі қазақстандық файтерлер Шавкат Рахмонов пен Асу Алмабаевтың жаттықтырушысы Эдуард Базровпен тілдесті. Ол өз шәкірттерін Ақ үйдегі турнирге жіберуге қуана келісетінін, бірақ мұндай ұсыныс түспегенін айтты.

"Иә, біздің жігіттердің бірі Ақ үйде өнер көрсеткенін қалар едік, бірақ өкінішке қарай олай болмады. Бізге қатысу туралы ұсыныс жасалмады. 27 маусымда Бакуде Асу Алмабаевтың жекпе-жегі бар, бірақ оны 14 маусымға ауыстыру туралы да ұсыныстар келген жоқ", - деді Эдуард Базров Tengri Sport-қа берген сұхбатында.

Турнирде қазақстандықтардың жоқтығынан бөлек, жанкүйерлер басты жекпе-жекке таңдалған үміткерлерге де наразы болды.

ММА жанкүйерлерінің пікірінше, жеңіл салмақта титулға лайықтырақ үміткер бар, ол - армян файтері Арман Царукян. Эдуард Базров та бұл пікірмен келіседі.

"Арман бұған сөзсіз лайық және ол тек UFC-де емес, RAF сияқты басқа жерлерде де жұлдыз бола алатынын көрсетті. Ол күрес лигасында да қазір жұлдыз, табысы да жақсы, танымалдылығы ММА-дағы кезінен әлдеқайда артты. Ал кардтың қалған қатысушыларына келер болсақ, бұл кәдімгі турнир, тек өтетін орны қосымша ерекшелік беріп тұр", - деп толықтырды жаттықтырушы.

Еске салайық, 27 маусымда Бакудегі (Әзірбайжан) "Baku Crystal Hall" аренасында UFC Fight Night 280 турнирі өтеді. Бұл додада Қазақстанның үздік UFC файтері Асу Алмабаев жекпе-жекке шығады. Оның қарсыласы америкалық Чарльз Джонсон болмақ.

Instagram-дағы бұл жарияланымды көру

Асу Алмабаевтың (@asu_zulfikar57) жарияланымы

Сондай-ақ осы турнирде тағы бір қазақстандық жеңіл салмақ өкілі Бекзат Алмахан өнер көрсетеді. Ол бразилиялық файтер Жан Мацумотомен жұдырықтасады.

Instagram-дағы бұл жарияланымды көру

ALMAKHAN BEKZAT (@bekzatalmahan) жарияланымы

Ал Шавкат Рахмонов октагонға соңғы рет 2024 жылдың желтоқсанында шыққан. Сол кезде ол чемпион Белал Мухаммадтың орнына шыққан ирландиялық Иэн Гэрриді бес раундтық жекпе-жекте төрешілер шешімімен жеңген болатын.

Instagram-дағы бұл жарияланымды көру

Shavkat Rakhmonov (@shavkatrakhmonov94) жарияланымы

Жартылай орта салмақтағы чемпиондық атақ үшін таласқа қатысты бірнеше ауыс-түйістен кейін қазақстандық файтер жекпе-жексіз қалды.

Кейінірек, 2026 жылдың 31 қаңтарында Шавкат Рахмонов Naiza турниріне балдақпен келді, содан кейін оның жарақаты туралы мәлімдеме жасалды.

Көп ұзамай UFC қазақстандықты сол кезде екінші сатыда тұрған жартылай орта салмақ рейтингінен шығару туралы шешім қабылдады.

Instagram-дағы бұл жарияланымды көру

Shavkat Rakhmonov (@shavkatrakhmonov94) жарияланымы