“Қазақтар осал емес“: Жәнібек Әлімханұлы Канелоға үндеу тастады

Жәнібек Әлімханұлы әлеуметтік желідегі парақшасында қазақстандықтарға үндеу жариялады.

Боксшы бокс аңызы, бес салмақ дәрежесі бойынша бұрынғы әлем чемпионы, мексикалық Сауль Альваресті оңай жеңетініне жанкүйерлерін сендірді.

"Кей жанкүйерлердің көкейінде "Жәнібек Канелоны жеңе ала ма екен?" деген сұрақ бар сияқты. Егер Канело менімен шығуға батылы жетсе, жалпақ тілмен айтқанда оны шайнамай жұтамын! Құдай тәкаппарлықтан сақтасын, сенімді түрде айтайын, мен өз деңгейім мен оның деңгейін жақсы білемін!

Қазақтар осал емес! Кәсіпқой бокста өз орны бар ұлтпыз! Тілеулес жанкүйердің бәріне мың алғыс! Біз енді басқаша болып ораламыз! Супер орта салмақтың ағысын өзгерту үшін келдік!", - деп жазды Әлімханұлы әлеуметтік желіде.

Скриншот: instagram.com/janibek_alimkhanuly

Әлімханұлы Канелоға қарсы: чемпион неге титулынан бас тартты?

Еске сала кетейік, қазақстандық бокстан әлем чемпионы Жәнібек Әлімханұлы салмақ дәрежесін көтеру үшін орта салмақтағы титулынан бас тартуды шешті. Қазақстандық боксшының менеджері Берік Сұлтанның айтуынша, бұл шешімнің себептерінің бірі - танымал қарсыластардың пайда болуы.

"Бізде екі орта салмақтағы титул болды, бірақ өкінішке қарай, біз танымал қарсыластармен кездескен жоқпыз. Олар орта салмақта қалмады немесе Жәнібекпен жұдырықтасқысы келмеді. Қазір супер орта салмақта көптеген танымал боксшы бар.

Канело да, супер орта салмақта Калеб Плант, Эдгар Берланга, Шираз және Хайме Мунгуия да бар. Танымал боксшылармен жұдырықтасу да біз үшін басымдық. Қазір бәрін ұйымдастыруға тырысамыз", - деді Әлімханұлының менеджері Tengri Sport басылымына берген сұхбатында.

Осылайша, жаңа WBO рейтингі ресми түрде жарияланғаннан кейін, Жәнібек Әлімханұлы өткен жылдан бері айтып келе жатқан Саул Канело Альвареске қарсы жекпе-жекке жақындады.

"Жәнібек Канелоға қарсы! Бұл жекпе-жек менің мақсатым! Мен супер орта салмаққа көтерілуге ​​дайынмын! Көптеген жанкүйерл де бұл жекпе-жекті көргісі келетініне сенімдімін", - деп жазды Жәнібек әлеуметтік желіде.

Еске сала кетейік, 2025 жылдың желтоқсанында кубалық Эрисланди Лараға қарсы үшінші әлемдік титул үшін жекпе-жекке бірнеше күн қалғанда Жәнібек Әлімханұлының қанынан тыйым салынған зат - мельдоний табылған болатын.

Бұған дейін WBO супер орта салмақтағы рейтингтің жаңа нұсқасын жариялаған болатын, онда Жәнібек Әлімханұлы Сауль Канело Альварестен кейін бірден екінші сатыға жайғасты.