Құрамадағы орнынан айырылған қазақстандық әлем чемпионы кәсіпқой боксқа ауысты

Санжар Тәшкенбай Халықаралық бокс күніне орайластырылған турнирде бақ сынайды. Қазақстандық боксшының қарсыласы филиппиндік Нил Джакамос болмақ. Жекпе-жекте аса жеңіл салмақтағы бос тұрған IBF Asia чемпионы титулы сарапқа салынады. Турнир 28 тамызда Астана қаласында өтеді.

Қазақстандықтың қарсыласы кәсіпқой рингте сегіз кездесу өткізіп, жеті жеңіске жеткен және бір рет жеңілген. Филиппин спортшысы әлемдік рейтингте үздік 50 боксшының қатарына кіреді. 2025 жылы ол өз елінің чемпионы атанып, WBC жастар белбеуіне үміткер болған.

Тәшкенбай және Қазақстан құрамасы

Бұған дейін Санжар Тәшкенбайдың Жапонияда өтетін Азия ойындарына қатысатын Қазақстан құрамасының сапына енбейтіні белгілі болған еді. Бұл жарыстың тек алты салмақ дәрежесінде өтетіндігімен және оның ішіндегі ең жеңіл салмақтың 55 келіге дейін екендігімен байланысты.

Қазақстан бокс федерациясының Tengri Sport-қа берген мәліметінше, бұл Тәшкенбай өнер көрсететін 50 келіге дейінгі салмақ дәрежесінің Олимпиада бағдарламасына енбеуімен де түсіндіріледі.

Осылайша, бұл циклде Тәшкенбай Азия чемпионатына, әлем чемпионатына және әлем кубогіне қатысады, бірақ кешенді жарыстардан тыс қалады. 2027 жылы Астанада өтетін әлем чемпионатында ол ел тарихындағы тұңғыш үш дүркін әлем чемпионы атануы мүмкін.

Естеріңізге сала кетейік, Азия ойындары 2026 жылдың 19 қыркүйегі мен 4 қазаны аралығында Жапонияның Аичи префектурасы мен Нагоя қаласында өтеді.

Бұған дейін осы маусымдағы басты додаларға қатысатын Қазақстан әйелдер құрамасының сапы жарияланған болатын.